विदेश पठाउने भनी ३१ लाख ठगी गर्ने दुई जना पक्राउ
काठमाडौं : रोजगारीका लागि क्रोएशिया र ग्रीस पठाउने भन्दै ३१ लाख ठगी गरेको अभियोगमा प्रहरीले दुई जनालाई पक्राउ गरी आज सार्वजनिक गरेको छ।
पक्राउ पर्नेमा काभ्रेपलान्चोकको पनौती नगरपालिका- १२ घर भई हाल काठमाडौँ महानगरपालिका- ८ बस्ने ४३ वर्षीया उपासना भण्डारी तथा कैलालीको टीकापुर नगरपालिका- १ घर भई हाल ललितपुर महानगरपालिका- ११ बस्ने २३ वर्षीय युवराज कुँवर रहेका काठमाडौं उपत्यका अपराध अनुसन्धान कार्यालयका प्रहरी उपरीक्षक मनोहरप्रसाद भट्टले जानकारी दिए।
पक्राउ परेकामध्ये भण्डारीले क्रोएशिया पठाउने भन्दै १२ लाख तथा कुँवरले ग्रीस पठाउने भन्दै १९ लाख रकम लिई फरार रहेको उजुरीका आधारमा प्रहरीले दुवै जनालाई पक्राउ गरेको हो। उनीहरूलाई काठमाडौं महानगरपालिका- ३१ बाट पक्राउ गरी थप अनुसन्धान तथा आवश्यक कारबाहीका लागि आजै वैदेशिक रोजगार विभाग ताहाचल पठाइएको प्रहरी उपरीक्षक भट्टले बताए।
माघ २३, २०८२ शुक्रबार २१:४३:१७ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
