हामी संख्या पुर्‍याउन मात्र विश्वकप जान लागेको होइनौँ, जुझारु र आक्रामक क्रिकेट खेल्छौँ : प्रशिक्षक स्टुअर्ट ल

काठमाडौं : नेपाली राष्ट्रिय क्रिकेट टोलीका मुख्य प्रशिक्षक स्टुअर्ट लले आसन्न टी-२० विश्वकपमा नेपाल केवल सहभागिता जनाउन र संख्या पुर्याउन मात्र जान नलागेको बताएका छन्।

विश्वकपको अन्तिम तयारीका लागि भारत र श्रीलंका प्रस्थान गर्नुअघि नेपाल क्रिकेट संघ (क्यान) ले सार्वजनिक गरेको भिडियो अन्तरवार्तामा बोल्दै प्रशिक्षक लले नेपालले विश्वकपमा आफ्नो छाप छोड्ने लक्ष्य राखेको बताएका हुन्।

प्रशिक्षक लले नेपाली टोलीलाई विश्वसामु जुझारु, आक्रामक र कहिल्यै हार नमान्ने टोलीको रूपमा चिनाउन चाहेको बताए।

‘हामी त्यहाँ केवल संख्या पुर्याउन गइरहेका छैनौँ, हामी प्रतिस्पर्धा गर्न जाँदैछौँ,’ उनले भने, ‘हामीले विश्वकप जित्छौँ भनेर अहिल्यै भन्न गाह्रो होला, तर हामीले सपना देख्नुपर्छ। यदि हामीले राम्रो क्रिकेट खेल्यौँ र सही समयमा सही प्रदर्शन गर्यौँ भने हामी ठूला टोलीलाई पनि समस्यामा पार्न सक्छौँ र हराउन सक्छौँ।’

खेलाडीहरूको अनुशासन र खेलप्रतिको लगाव देखेर आफू प्रभावित भएको उनले बताए। खेलाडीहरूले देशका लागि खेल्न देखाएको जोस र जिमदेखि मैदानसम्म देखाएको व्यावसायिकताको उनले प्रशंसा गरे।

‘खेलाडीहरू एकदमै प्रतिबद्ध छन्। उनीहरूले आफ्नो खानपान, फिटनेस र अभ्यासमा जसरी ध्यान दिएका छन्, त्यो उत्कृष्ट छ’, उनले भने। उनले छोटो समयमै नेपाली क्रिकेटले हासिल गरेको सफलताप्रति विश्वले गर्व गर्नुपर्ने धारणा राखे।

विश्वकप अघि भारत (मुम्बई) र श्रीलंकामा हुने अभ्यास खेलहरू टोलीका लागि निकै महत्त्वपूर्ण हुने प्रशिक्षक लको भनाइ छ। विशेष गरी मुम्बईको वानखेडे स्टेडियममा खेल्न पाउनु नेपाली खेलाडीका लागि ठूलो अवसर भएको उनले बताए।

‘मुम्बईको पिचमा राम्रो बाउन्स र गति हुन्छ, जुन हाम्रा लागि नयाँ अनुभव हुन सक्छ। त्यहाँको ऐतिहासिक मैदानमा खेल्दा खेलाडीले ठूलो मञ्चको अनुभव सँगाल्नेछन्’, उनले थपे।

उनले अहिले नै नतिजाको पछि लाग्नुभन्दा पनि ‘एक पटकमा एउटा इँटा थप्दै घर बनाउने’ रणनीतिमा टोली अघि बढिरहेको बताए।

नेपाली समर्थकहरूको क्रेज देखेर आफू चकित परेको बताउँदै प्रशिक्षक लले समर्थकहरूलाई धैर्य गर्न आग्रह गरे।

‘नेपाली समर्थकहरूको माया र साथ अविश्वसनीय छ। म उहाँहरूलाई यति मात्र भन्न चाहन्छु कि धैर्य राख्नुस्। ठूला टोलीलाई हराउन सजिलो छैन, तर हामी तपाईंहरूलाई खुसी दिन आफ्नोतर्फबाट उत्कृष्ट प्रयास गर्नेछौँ’, उनले भने।

नेपाली टोली आइतबार भारत जाँदैछ। त्यहाँ र श्रीलंकामा अभ्यास खेल खेलेपछि टोली विश्वकपका लागि वेस्ट इन्डिज र अमेरिका जानेछ।