थाइल्यान्ड र कम्बोडियाबीच युद्धविराम, शान्ति स्थापनामा सहमति

एजेन्सी : थाइल्यान्ड र क्याम्बोडियाले सीमा क्षेत्रमा जारी हिंसात्मक संघर्ष रोक्न तत्काल युद्धविराम गर्ने सहमति गरेका छन्। शनिबार भएको यो सहमतिसँगै दुवै देशले शान्ति स्थापनाका लागि प्रतिबद्धता व्यक्त गरेका छन्।

विगत तीन हप्तादेखि जारी सीमा संघर्षका कारण कम्तीमा ४७ जनाको ज्यान गएको छ भने एक लाखभन्दा बढी मानिस विस्थापित भएका छन्।

सहमतिका मुख्य बुँदाहरू:
हथियार प्रयोगमा रोक: दुवै पक्षले सबै प्रकारका हतियारको प्रयोग बन्द गर्नेछन्।
नागरिक सुरक्षा: नागरिक र भौतिक संरचनामाथिको आक्रमण रोकिनेछ।
पुनर्स्थापना: सीमा क्षेत्रबाट विस्थापित नागरिकलाई यथाशीघ्र घर फर्कने वातावरण बनाइनेछ।
साइबर सहकार्य: साइबर अपराध नियन्त्रणका लागि दुवै देशले सहकार्य गर्नेछन्।

यो युद्धविराम तीन दिनसम्म चलेको सघन सीमा वार्तापछि सम्भव भएको हो। वार्तामा दक्षिणपूर्वी एसियाली राष्ट्रहरूको संगठन (आसियान), संयुक्त राज्य अमेरिका, चीन र मलेसियाले मध्यस्थताको भूमिका निर्वाह गरेका थिए।

द्वन्द्वको मुख्य कारण उपनिवेशकालीन सिमाङ्कन रहेको छ, जहाँस्थित एक प्राचीन मन्दिरमा दुवै देशले आफ्नो दाबी गर्दै आएका छन्।

थाइल्यान्डका प्रधानमन्त्रीले यस सहमतिलाई अन्तिम रूप दिँदै दिगो शान्ति कायम गर्न आग्रह गरेका छन्। उनले विस्थापित नागरिकलाई घर फर्काउन सरकारले पूर्ण सहयोग गर्ने समेत बताए।

स्मरण रहोस्, थाइल्यान्डमा आगामी फेब्रुअरी ८ मा आम निर्वाचन हुने तय भएको छ। यो शान्ति सम्झौताले निर्वाचनको वातावरण बनाउन पनि सहयोग पुग्ने अपेक्षा गरिएको छ।