एसिसी यु-१९ : युएईसँग नेपालको २७ रनको हार, बलर चम्किए, ब्याटर चुके
काठमाडौं : संयुक्त अरब इमिरेट्स (युएई) मा सम्पन्न एसिसी पुरुष यु-१९ प्रिमियर कप क्रिकेटको उपाधि जित्न नेपाल चुकेको छ। नेपाललाई २७ रनले पराजित गरेर आयोजक युएईले उपाधि चुमेको हो।
फाइनलमा युएईले दिएको १४८ रनको लक्ष्य पछ्याएको नेपाल ३३ दशमलव दुई ओभरमा १२० रनमा समेटियो। नेपालका लागि कप्तान अशोक धामीले सर्वाधिक ३४, आशिष लुहार र रोशन विश्वकर्माले समान २५/५ रनको योगदान गरे पनि जिताउन सकेनन्। युएईका युग जै शर्मा र अली असगर शम्सले तीन/तीन विकेट हात पारे।
यसअघि अजमानस्थित करवान मैदानमा टस हारेर पहिला ब्याटिङ गरेको आयोजक युएई ४५ दशमलव पाँच ओभरमा १४७ रनमा अलआउट भयो। जसमा अहमद खुदादादले सर्वाधिक ७१ रन जोडे। नेपालका दयानन्द मण्डलले छ, अपराजित पौडलले दुई, कप्तान अशोक धामी र नितेसकुमार पटेलले एक/एक विकेट लिए।
यसैबीच नेपाल र युएई एसिया कप खेल्नका लागि भने यसअघि नै छनोट भइसकेका छन्। प्रतियोगिताको फाइनलमा पुग्ने दुवै टोली सिधै एसिया कपमा छनोट हुने प्रावधान थियो। यु-१९ एसिया कप आगामी डिसेम्बरमा युएईमै हुँदैछ।
मंसिर १५, २०८२ सोमबार १८:०४:०४ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
