एनपीएलमा सुदूरपश्चिमको लगातार पाँचौं जित

काठमाडौं : दोस्रो संस्करणको नेपाल प्रिमियर लिग (एनपीएल)मा शनिबारको दोस्रो खेलमा सुदूरपश्चिम रोयल्सले ६ विकेटले जित हासिल गरेको छ।
 
शनिबार त्रिवि क्रिकेट मैदानमा भएको खेलमा सुदूरपश्चिमले १७.४ ओभरमा ४ विकेट गुमाउँदै १४८ रन बनाएर जित हासिल गरेको हो। जनकपुर बोल्ट्सले निर्धारित २० ओभारको खेलमा ८ विकेट गुमाउँदै १४६ रनको मात्र लक्ष्य दिएको थियो।

जनकपुर बोल्ट्सले टस जितेर सुदूरपश्चिमलाई बलिङको निम्तो दिएको थियो। सुदूरपश्चिम रोयल्स हालसम्म अपराजित रहेको छ। सुदूरपश्चिमले ५ खेलमा ५ जितसहित अंक तालिकाको शीर्ष स्थानमा रहेको छ।

सुदूरपश्चिम रोयल्सले पहिलो खेलमा काठमाडौं गोर्खाजलाई २९ रनले हराएको थियो। दोस्रो खेलमा पोखरा एभेन्जर्सलाई १८ रन, तेस्रो खेलमा कर्णाली याक्सविरुद्ध ४५ रन र चौथो खेलमा लुम्बिनी लायन्सलाई ७ विकेटले हराएको थियो भने आजको पाँचौं खेलमा जनकपुर बोल्ट्सलाई ६ विकेटले हराएको हो। 

जनकपुर बोल्ट्सको यो चौथो खेल हो। जनकपुरले यसअघि कुनै पनि खेल जितेको छैन। पहिलो खेलमा काठमाडौं गोर्खाजसँग ५ विकेटले हारेको जनकपुरले दोस्रो खेलमा विराटनगरसँग ९ र तेस्रो खेलमा पोखरा एभेन्जर्ससँग २५ रनले हार बेहोरेको थियो।