एनपीएलमा लुम्बिनीको दोस्रो जित, पोखरा एभेन्जर्स ३ विकेटले पराजित

कीर्तिपुर : नेपाल प्रिमियर लिग (एनपीएल) अन्तर्गत आजको पहिलो खेलमा लुम्बिनी लायन्सले पोखरा एभेन्जर्सलाई ३ विकेटले पराजित गरेको छ।

पोखराले दिएको १५१ रनको लक्ष्य लुम्बिनीले अन्तिम ओभरको चौथो बलमा ७ विकेट गुमाएर पूरा गर्यो। लुम्बिनीले प्रतियोगितामा दोस्रो जित निकालेको हो।

लक्ष्य पछ्याउने क्रममा लुम्बिनीको सुरुआत भने राम्रो हुन सकेन। टोलीले २२ रन जोड्दा आफ्ना ओपनर सुमित महर्जन (०) र डार्सी सर्ट (७) लाई गुमाइसकेको थियो।

तर, कप्तान रोहित पौडेल र विकेटकिपर निरोशन डिक्वेलाले इनिङ सम्हाले। पौडेलले ३६ बलमा ४० रन बनाए भने डिक्वेलाले २२ बलमा आक्रामक ३७ रनको योगदान दिए।

मध्यक्रममा धर्मराएको लुम्बिनीका लागि सन्दीप जोराले जिम्मेवारीपूर्ण ब्याटिङ गरे। जोराले २२ बलमा अविजित २५ रन बनाउँदै टोलीलाई जितको नजिक पुर्याए। यस्तै गुल्बादीन नाइबले ११ बलमा २ छक्कासहित १७ रन बनाए।

बलिङतर्फ पोखराका विपिन खत्रीले ४ ओभरमा १८ रन खर्चेर २ विकेट लिए। यस्तै म्याट टेलर र सागर ढकालले पनि समान २-२ विकेट लिए पनि टोलीलाई जिताउन सकेनन्।

यसअघि टस हारेर पहिले ब्याटिङको निम्तो पाएको पोखरा एभेन्जर्सले निर्धारित २० ओभरमा ५ विकेट गुमाउँदै १५० रनको सम्मानजनक योगफल तयार पारेको थियो।

पोखराको सुरुआत निकै खराब रह्यो। पावरप्ले सकिँदा नसकिँदै र ७.६ ओभरमा ३३ रन हुँदा टोलीले दिनेश खरेल, कुशल भुर्तेल, सुमित वर्मा र तृतराज दास गरी आफ्ना ४ प्रमुख ब्याटर गुमाइसकेको थियो।

सङ्कटमा परेको पोखराको इनिङलाई एडम रोसिङ्टन र जेम्स निसमले उकासे। यी दुईबीच पाँचौं विकेटका लागि ९२ रनको उत्कृष्ट साझेदारी भयो। रोसिङ्टनले ६३ बलमा ७ चौका र ५ छक्काको मद्दतले सर्वाधिक ८१ रन बनाए। यस्तै जेम्स निसमले ३२ बलमा ३ चौका र ३ छक्का प्रहार गर्दै ५१ रनमा अविजित रहे।

लुम्बिनीका बलर शेर मल्ल र तिलक भण्डारीले पोखरालाई रोक्न कसिलो बलिङ गर्दै समान २-२ विकेट लिए भने गुल्बादीन नाइबले १ विकेट हात पारे।