खराब सुरुआतका बाबजुद पोखराले लुम्बिनीलाई दियो १५१ रनको लक्ष्य, रोसिङटन र निसमको अर्धशतक

काठमाडौं : नेपाल प्रिमियर लिग (एनपीएल) अन्तर्गत आजको पहिलो खेलमा पोखरा एभेन्जर्सले लुम्बिनी लायन्सलाई जितका लागि १५१ रनको लक्ष्य दिएको छ।

कीर्तिपुरस्थित त्रिवि अन्तर्राष्ट्रिय क्रिकेट मैदानमा टस हारेर पहिला ब्याटिङको निम्तो पाएको पोखराले निर्धारित २० ओभरमा ५ विकेट गुमाउँदै १५० रनको सम्मानजनक योगफल तयार पार्यो।

पोखराको सुरुआत निकै खराब रहेको थियो। इनिङ्सको ३३ रन जोड्दा टोलीले आफ्ना शीर्ष ४ विकेट गुमाइसकेको थियो।

ओपनर दिनेश खरेल ७ रन, कप्तान कुशल भुर्तेल र सुमित वर्मा शून्य रन तथा तृतराज दास १ रनमा आउट भएपछि पोखरा संकटमा परेको थियो।

तर, ओपनर एडम रोसिङटन र जेम्स निसमले पाँचौँ विकेटका लागि ९२ रनको सानदार साझेदारी गर्दै टोलीलाई सम्मानजनक अवस्थामा पुर्याए। रोसिङटनले ६३ बलमा ७ चौका र ५ छक्काको मद्दतले सर्वाधिक ८१ रन बनाए। उनी १८.२ ओभरमा आउट भए।

त्यस्तै, आक्रामक इनिङ्स खेलेका जेम्स निसमले ३२ बलमा ३ चौका र ३ छक्का प्रहार गर्दै अविजित ५१ रन बनाए। पोखराले अन्तिम ५ ओभरमा मात्र ७६ रन जोडेको थियो।

बलिङतर्फ लुम्बिनी लायन्सका शेर मल्ल र तिलक भण्डारीले उत्कृष्ट प्रदर्शन गरे। शेर मल्लले ४ ओभरमा २३ रन खर्चेर २ विकेट लिए भने तिलक भण्डारीले ४ ओभरमा २५ रन दिएर २ विकेट हात पारे।

गुल्बादीन नाइबले ४ ओभरमा २० रन दिँदै १ विकेट लिए। रुबेन ट्रम्पलम्यान र अभिषेक गौतम भने महँगो साबित भए।

रोहित पौडेलको कप्तानीमा रहेको लुम्बिनी लायन्सले अब केही बेरमा १५१ रनको लक्ष्य पछ्याउँदै जवाफी ब्याटिङ गर्नेछ।