लुम्बिनी सिरेमिक्स र नबिल बैंकबीच ‘च्यानल फाइनान्सिङ’ सम्झौता, डिलरहरूलाई विशेष बैंकिङ सुविधा

काठमाडौं : लुम्बिनी सिरेमिक्स लिमिटेडद्वारा उत्पादित ‘लामिनार’ ब्रान्डका टाइल्सका आधिकारिक बिक्रेता (डिलर) हरूलाई वित्तीय सहजता प्रदान गर्न कम्पनीले नबिल बैंकसँग साझेदारी गरेको छ। यससम्बन्धी ‘च्यानल फाइनान्सिङ’ सम्झौतामा दुई संस्थाबीच हस्ताक्षर भएको हो।

काठमाडौंमा आयोजित एक कार्यक्रमका बीच लुम्बिनी सिरेमिक्सका प्रमुख वित्त अधिकारी प्रकाश पौडेल र नबिल बैंकका प्रमुख व्यापार अधिकारी टेकराज भट्टले समझदारी पत्रमा हस्ताक्षर गर्दै आदान-प्रदान गरे।

यो साझेदारीसँगै लामिनार टाइल्सका देशभर रहेका डिलरहरूले नबिल बैंकमार्फत सहुलियतपूर्ण रूपमा चालु पुँजी प्राप्त गर्न सक्नेछन्। यसले स्टक व्यवस्थापन गर्न र व्यवसाय सञ्चालनलाई थप सुदृढ बनाउन मद्दत पुग्ने बताइएको छ।

सम्झौताअनुसार बैंकले डिलरहरूलाई प्रशासकीय शुल्कमा सहुलियत, बैंकिङ सेवामा छुट, कर्पोरेट मोबाइल बैंकिङ, सेफ-डिपोजिट लकर र पि.ओ.एस मेसिन शुल्कमा ५० प्रतिशत छुट, एसएमएस ट्रान्जेक्सन अलर्ट सेवा निःशुल्क, डिलरका मुख्य कर्मचारीका लागि अधिकतम ५ लाख रुपैयाँ सीमासहितको निःशुल्क क्रेडिट कार्ड र नबिल केयरअन्तर्गत ‘क्रिटिकल इलनेस’ (जटिल रोग) बीमा सुविधा दिने भएको छ।

यो सहकार्यले डिलरहरूको तरलता समस्या समाधान गर्ने, आर्थिक भार कम गर्ने र समग्रमा नेपालको टाइल्स उद्योगको दिगो विकासमा टेवा पुग्ने विश्वास दुवै संस्थाले लिएका छन्।