एयरबसको सफ्टवेयर अपडेट : विश्वभर हजारौं उडान प्रभावित हुने आशंका, एयर इन्डिया र इन्डिगोद्वारा सूचना जारी
काठमाडौं : विश्वको प्रमुख विमान निर्माता कम्पनी एयरबसले आफ्ना हजारौं विमानहरूका लागि नयाँ ‘सफ्टवेयर अपडेट’ को घोषणा गरेको छ।
सूर्यबाट निस्कने कडा विकिरणका कारण उडान नियन्त्रणका लागि आवश्यक ‘डाटा’ मा खराबी आउन सक्ने जोखिम देखिएपछि कम्पनीले यो कदम चालेको हो।
यो अपडेटका कारण विश्वभरका करिब ६ हजार विमानको उडान तालिका प्रभावित हुने अनुमान गरिएको छ।
अमेरिकन एयरलाइन्स, डेल्टा, एयर इन्डिया र विज एयर जस्ता विश्वका प्रमुख एयरलाइन्सहरूले यो सफ्टवेयर अपडेटका कारण आफ्ना सेवाहरूमा असर पर्न सक्ने बताएका छन्।
यसको प्रभाव नेपालमा उडान भर्ने भारतीय एयरलाइन्सहरूमा पनि देखिएको छ। एयर इन्डियाले एक ट्राभल एडभाइजरी जारी गर्दै आफ्ना उडानहरूमा ढिलाइ हुन सक्ने जानकारी दिएको छ।
एयर इन्डियाले सामाजिक सञ्जाल एक्समा लेखेको छ, ‘हामीलाई एयरबसको ए-३२० सिरिजका विमानसम्बन्धी निर्देशन प्राप्त भएको छ। यसका कारण हाम्रा केही विमानमा सफ्टवेयर र हार्डवेयरको पुनः व्यवस्थापन गर्नुपर्ने भएकाले उडानको समय लम्बिने र निर्धारित उडानहरूमा ढिलाइ हुनेछ।’
एयर इन्डियाले यात्रुहरूलाई विमानस्थल जानुअघि उडानको अवस्था बुझ्न आग्रह गरेको छ।
त्यस्तै, अर्को भारतीय वायुसेवा कम्पनी इन्डिगोले पनि एयरबसको प्राविधिक सल्लाहअनुसार आफ्ना विमानहरूमा आवश्यक अपडेट गरिरहेको जनाएको छ।
इन्डिगोले केही उडान तालिकामा सामान्य परिवर्तन हुन सक्ने भन्दै यात्रुहरूलाई वेबसाइट वा एपमार्फत उडानको अवस्था जाँच गर्न अनुरोध गरेको छ।
यसैबीच, बेलायती एयरलाइन्स ‘इजीजेट’ले भने आवश्यक सफ्टवेयर अपडेट गरिसकेको र आफ्ना उडानहरू सामान्य रूपमा सञ्चालन हुने जनाएको छ।
लन्डनको हिथ्रो विमानस्थलले उडानमा कुनै असर नपर्ने बताएको छ भने ग्याटविक विमानस्थलले केही समस्या आउन सक्ने आशंका व्यक्त गरेको छ।
बेलायतकी यातायात मन्त्री हेइडी अलेक्जेन्डरले बेलायतका एयरलाइन्सहरूमा यसको प्रभाव सीमित देखिने बताएकी छन्।
यद्यपि, यात्रुहरूलाई थप जानकारीका लागि सम्बन्धित एयरलाइन्ससँग सम्पर्कमा रहन सुझाव दिइएको छ।
मंसिर १३, २०८२ शनिबार ०८:४४:३५ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
