एसीसी यू-१९ प्रिमियर कप : एसिया कप छनोटको नजिक नेपाल, सेमिफाइनलमा आज मलेसियासँग भिड्दै
काठमाडौं : संयुक्त अरब इमिरेट्स यूएईमा जारी एसीसी पुरुष यू-१९ प्रिमियर कप क्रिकेटको सेमिफाइनलमा नेपालले आज मलेसियासँग प्रतिस्पर्धा गर्दैछ।
अजमानस्थित क्रिकेट मैदानमा हुने यो खेल नेपाली समयअनुसार बिहान ९:०० बजे सुरु हुनेछ।
समूह ‘ए’ को विजेता बन्दै नेपाल र समूह ‘डी’ को विजेताका रूपमा मलेसिया अन्तिम चारमा प्रवेश गरेका हुन्। समूह चरणमा उत्कृष्ट प्रदर्शन गरेको नेपाल अपराजित रहँदै सेमिफाइनल पुगेको हो।
नेपालले पहिलो खेलमा साउदी अरेबियालाई ८ विकेटले र दोस्रो खेलमा हङकङलाई ११९ रनको फराकिलो अन्तरले पराजित गरेको थियो।
नेपालका लागि यो खेल निकै महत्त्वपूर्ण छ। १४ टोली सहभागी यस प्रतियोगिताबाट उत्कृष्ट तीन टोली आगामी डिसेम्बरमा यूएईमै हुने एसीसी यू-१९ एसिया कपका लागि छनोट हुनेछन्।
प्रतियोगिताको नियमअनुसार फाइनलमा पुग्ने दुई टोली सोझै एसिया कपमा छनोट हुनेछन्। तसर्थ, मलेसियालाई हराउन सके नेपाल एक खेल अगावै एसिया कपमा छनोट हुनेछ।
यदि सेमिफाइनलमा पराजित भएमा भने नेपालले तेस्रो स्थानका लागि हुने प्लेअफ खेल जित्नुपर्ने हुन्छ। सेमिफाइनलमा पराजित हुने दुई टोलीबीच तेस्रो स्थानका लागि प्रतिस्पर्धा हुनेछ।
मंसिर १३, २०८२ शनिबार ०७:५२:३१ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
