‘प्रसाद’ जोडीको पुनरागमन : ‘काजी’मा कस्तो देखियो विपिन र केकीको केमेस्ट्री ?

काठमाडौं : हरेक फिल्ममा फरक गेटअप र चरित्रमा देखिने अभिनेता विपिन कार्की यस पटक ‘काजी’ बनेर दर्शकमाझ आउँदै छन्। निर्माण पक्षले शुक्रबार चैत २७ गतेलाई प्रदर्शन मिति घोषणा गर्दै सार्वजनिक गरेको  फिल्मको 'फस्ट लुक'मा विपिनको चरित्र दर्शकमा कौतूहल जगाउने किसिमको छ।

फिल्म ‘प्रसाद’पछि दर्शकले रुचाएको विपिन कार्की र केकी अधिकारीलाई यस फिल्मले पुनः एकसाथ पर्दामा उतारेको छ। लामो समयको अन्तरालपछि यो जोडी फेरि एकसाथ पर्दामा देखिने भएपछि उनीहरूको चर्चा चुलिएको हो। पोस्टरमा चिटिक्क परेका विपिन र पुराना दिन सम्झिरहेकी केकीको लुक्सले कथावस्तुप्रति दर्शकको चासो बढाउने देखिन्छ।

रामप्रसाद रिजालको प्रस्तुति रहेको यस फिल्मलाई लक्ष्मण रिजालले निर्देशन गरेका हुन्। नाताले उनीहरू दाजुभाइ हुन्। लक्ष्मण करिब ८ वर्षको अन्तरालमा निर्देशनमा फर्किएका हुन्। उनले यसअघि फिल्म ‘कसम’, ‘धुवाँ यो नसा’, ‘अलबिदा’, ‘कायरा’ निर्देशन गरेका थिए भने ‘डिसेम्बर फल्स’ र ‘गणपति’ निर्माण गरेका थिए।

फिल्म काजीमा विपिन र केकीसँगै गरिमा शर्मा, प्रकाश घिमिरे, हेमन्त बुढाथोकी, विशाल पहारी, विनोद न्यौपाने, रश्मी भट्ट, हिउवाला गौतम, सन्दीपबाबु लोहनी, रोजी श्रेष्ठ, गंगा शर्मा, नवराज गिरि, बुद्धि सागर खनाल, प्रशंसा सुवेदी, कृतिका शर्माको अभिनय रहेको छ। त्यसै गरी बाल कलाकार दिक्षिता अर्याल छिन्।

प्रदीप भारद्वाजको लेखेको फिल्मलाई चिन्तन राजभण्डारीले खिचेका छन्। फिल्मको गीतसंगीत कालीप्रसाद बास्कोटा, प्रोड्क्सन डिजाइनर ओजस्वी ओझाले गरेकी छन् भने नृत्य निर्देशक कविराज गहतराजको छ। फिल्मको वितरक श्रीराम बालाजी फिल्म्सले गर्ने निर्माण पक्षको भनाई छ। 

चैत २७ गते फिल्म ‘राम नाम सत्य’,‘३६ को आँकडा’ले पनि आफ्नो प्रदर्शन मिति घोषणा गरिसकेका छन्। फिल्म ‘काजी’ले सोही मिति रोजेपछि अब त्रिपक्षीय भिडन्त हुने देखिन्छ। ‘राम नाम सत्य’मा बिराज भट्ट, समीर भट्टका अलावा अन्य कलाकार रहेका छन् भने ‘३६ को आँकडा’मा रेखा थापा, पूजा शर्मा र पछिल्लो समय चर्चामा रहेका महेश त्रिपाठी रहेका छन्। यो मितिमा अन्य फिल्म पनि प्रदर्शनमा आउन सक्ने चर्चा छ।