एनपीएलमा चितवनले टस जित्यो

काठमाडौं : नेपाल प्रिमियर लिग (एनपीएल) अन्तर्गत आज भइरहेको १५औं खेलमा चितवन राइनोजले टस जितेर पहिले फिल्डिङ गर्ने निर्णय गरेको छ।

कीर्तिपुरस्थित त्रिवि अन्तर्राष्ट्रिय क्रिकेट मैदानमा भएको टसमा चितवन राइनोजका कप्तान कुशल मल्लले टस जित्दै काठमाडौं गोर्खाजलाई पहिले ब्याटिङको निम्तो दिएका हुन्। खेल बिहान ११:४५ बजे सुरु हुँदैछ।

जारी प्रतियोगितामा दुवै टोलीले मिश्रित नतिजा निकालेका छन्। अंक तालिकामा हाल दुवै टोलीको समान ४-४ अंक रहेको छ। चितवनले ३ खेलमा २ जित र १ हारसहित ४ अंक छ भने काठमाडौं ४ खेलमा २ जित र २ हारसहित समान ४ अंक छ।

चितवन राइनोज नेट रन रेटका आधारमा काठमाडौं भन्दा अगाडि रहेको छ। पछिल्लो ५ खेलको नतिजा हेर्दा चितवनले आफ्नो पछिल्लो खेल जितेको छ भने काठमाडौं पनि जितसहित मैदान उत्रदैछ। यी दुई टोलीबीचको पछिल्लो भेटमा (२ डिसेम्बर २०२४ को रेकर्ड अनुसार) चितवनले ५ विकेटले जित हात पारेको थियो।

आजको खेलमा चितवनका लागि रवि बोपारा, कुशल मल्ल र बलिङतर्फ रिजन ढकाल तथा सोहेल तन्भिर मुख्य खेलाडीका रूपमा हेरिएको छ।

यस्तै, काठमाडौंका लागि अलराउन्डर गेरहार्ड इरास्मस र करण केसीको प्रदर्शन निर्णायक हुन सक्छ। ब्याटिङमा आकाश त्रिपाठीमाथि पनि नजर रहनेछ।

आजको खेलमा नेपालका बुद्धि प्रधान र श्रीलंकाका रविन्द्र विमलासिरी अन-फिल्ड अम्पायर रहेका छन् भने दुर्गा सुवेदी टिभी अम्पायरको भूमिकामा छन्। म्याच रेफ्रीमा मोहम्मद सफिक रहेका छन्।