एसेजको पहिलो टेस्टमा इंग्ल्याण्ड १७२ रनमै समेटियो, मिचेल स्टार्कद्वारा करिअरकै उत्कृष्ट बलिङ
एजेन्सी : अष्ट्रेलियाका स्टार बलर मिचेल स्टार्कको घातक बलिङसामु इंग्ल्याण्डका ब्याटरहरू निरीह बन्दा अष्ट्रेलिया र इंग्ल्याण्डबीचको प्रतिष्ठित एसेज सिरिजको पहिलो टेस्टको पहिलो दिनमै इंग्ल्याण्ड १७२ रनमै समेटिएको छ।
पर्थ स्टेडियममा टस जितेर पहिले ब्याटिङ रोजेको इंग्ल्याण्डको निर्णय आत्मघाती साबित भयो। इंग्ल्याण्डले ३२.५ ओभर मात्र क्रिजमा टिक्न सक्यो।
आजको खेलको मुख्य आकर्षण मिचेल स्टार्कको बलिङ रह्यो। ३५ वर्षीय बायाँ हाते पेसर स्टार्कले आफ्नो लामो टेस्ट करियरमा पहिलो पटक एकै इनिङमा ७ विकेट लिने कीर्तिमान बनाएका छन्।
स्टार्कले १२.५ ओभर बलिङ गर्दै ४ मेडन राखेर ५८ रन खर्चिँदै ७ विकेट हात पारे। यसअघि स्टार्कले टेस्ट क्रिकेटमा धेरै पटक ५ र ६ विकेटको सफलता प्राप्त गरे पनि ७ विकेटको कोसेढुंगा भने आज पर्थमा पूरा गरेका हुन्।
उनले इनिङको पहिलो ओभरमै ओपनर ज्याक क्रलीलाई शून्यमा आउट गराएर सुरु गरेको विकेटको सिलसिला अन्तिमसम्म जारी राखे। उनले जो रुट, कप्तान बेन स्टोक्स र विकेटकिपर जेमी स्मिथजस्ता मुख्य खेलाडीलाई पेभिलियनको बाटो देखाए।
आफ्नो स्विङ र योर्करका लागि परिचित स्टार्कले आज पुरानो लय समात्दै इंग्ल्याण्डको मध्यक्रम र तल्लो क्रमलाई ध्वस्त पारे।
इंग्ल्याण्डका लागि ह्यारी ब्रुकले सर्वाधिक ५२ रनको अर्धशतकीय पारी खेले भने ओली पोपले ४६ रन बनाए। विकेटकिपर जेमी स्मिथले ३३ रन जोडे पनि अन्य ब्याटरले दोहोरो अङ्क छुन सकेनन्।
इंग्ल्याण्डको सुरुवात निकै खराब रह्यो। अनुभवी ब्याटर जो रुट ७ बल खेलेर खाता नखोली आउट भए भने ओपनर ज्याक क्रली पनि डकआउट भए।
एक समय ५ विकेट गुमाएर ११५ रन बनाएको इंग्ल्याण्डले अन्तिम ५ विकेट गुमाउँदा स्कोरबोर्डमा केवल ५७ रन थप्न सक्यो। विशेष गरी १६० रनमा छैटौं विकेट गुमाएको इंग्ल्याण्डले बाँकी ४ विकेट मात्र १२ रनको अन्तरमा गुमायो।
अष्ट्रेलियाका लागि डेब्यु गरिरहेका ब्रेन्डन डगेटले २ विकेट लिए भने क्यामरुन ग्रीनले १ विकेट हात पारे। अष्ट्रेलियाले पनि यस खेलमा जेक वेदरल्ड र ब्रेन्डन डगेटलाई डेब्यु गराएको छ।
पहिलो इनिङमा सस्तोमै समेटिएपछि इंग्ल्याण्ड दबाबमा परेको छ भने अष्ट्रेलियाले पहिलो दिनको दोस्रो सेसनमै ब्याटिङ थाल्नेछ।
मंसिर ५, २०८२ शुक्रबार १२:००:१७ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
