साझासँग अलग हुने तयारीमा विवेकशील समूह : नयाँ पार्टीलाई बधाई दिँदै मिलनले भने' एकता गर्नु गल्ती भयो'

काठमाडौँ : पार्टीका संस्थापक उज्ज्वल थापा लगायतकाहरु असहमत हुँदाहुँदै साझा पार्टीसँग एकता गरेका तत्कालीन विवेकशील दलका अध्यक्ष मिलन पाण्डेले एकता गर्दा गल्ती भएको स्वीकार गरेका छन्।

साझासँगको एकता प्रक्रियामा असहमत समूहले निर्वाचन आयोगमा नयाँ दल दर्ता गरेपछि सामाजिक सञ्जाल फेसबुकमा लेख्दै उनले साझाबाट आफू चाँडै नै अलग हुने सङ्केत गर्दै भनेका छन्' विवेकशील र साझाको एकीकरणको नेतृत्व मैले गरेको हुँदा म तपाईँहरू १३ जनासँग माफी माग्छु। हाम्रो उद्देश्य पवित्र थियो। खेर अघि बढौँ। तपाईँहरूलाई शुभकामना। राम्रो गर्नुहोस्। छिट्टै अभियानमा भेट हुने नै छ। साङ्गठनिक रूपमा पनि छिट्टै नै हामी संगैनै हुनेछौँ।'

विवेकशीलको महाधिवेशनबाट पाण्डे विवेकशीलको अध्यक्ष भएपछि उनले पुन साझा पार्टीसँग एकता गरेका थिए। एकता गरेर संयोजक भएका उनको समूहलाई अध्यक्ष रवीन्द्र मिश्र समूहले बहुमतको आधारमा एक्लाउँदै पार्टीको राजनीतिक लक्ष्य नै परिवर्तन गरेपछि अहिले पाण्डे समूह साझामा बस्न सक्ने अवस्थामा छैन। बहुमतको अभावमा विभाजनको निर्णय गर्न नसके पनि विवेकशीलबाट साझामा गएका युवा नेताहरूले राजीनामा दिइरहेका छन्।

एकता प्रक्रियामा संस्थापक थापासहितको समूह बाहिरै बसेको थियो। स्वास्थ्यमा गम्भीर समस्या आएपछि थापाको निधन भयो। हालै कर्मा लामा तामाङको अध्यक्षमा सो समूहले निर्वाचन आयोगमा नेपाल विवेकशील पार्टी दर्ता गरेका थिए।

उज्ज्वल थापाको अभियान ब्युँताउन नेपाल विवेकशील पार्टी दर्ता, अध्यक्षमा कर्मा

नयाँ पार्टी दर्ता भएपछि उनले फेसबुकमा लामो सन्देश लेख्दै माफी मागेका छन्। उनले लेखेका छन्'सुसंस्कृत राजनीतिमा अर्को पक्षले लेखेकै र भएकै सहमति मान्नु मेरो गल्ती भयो भन्नुपरेको छ। आज वैकल्पिक राजनीतिमा लप्पनछप्पन नजान्दा यो परिस्थिति आएको हो।'

उनले फेसबुकमा लेखेको सन्देश :

प्रिय साथीहरू,

तपाईँहरूलाई पार्टी दर्ताका निम्ति धेरै धेरै बधाई छ। तपाईँहरूले सुसंस्कृत राजनीति, वैकल्पिक राजनीति र विवेकशील आन्दोलनलाई न्याय गर्नुहुनेछ र नेतृत्व गर्नुहुनेछ भन्ने विश्वास छ। शुभकामना छ।

आज यही सन्दर्भमा म अर्को एउटा कुरा पनि स्वीकार गर्न चाहन्छु।

गत मङ्सिरमा विवेकशील र साझा पार्टीको एकीकरण हुँदै गर्दा तपाईँहरूले 'गणतन्त्र, सङ्घीयता, धर्म निरपेक्षता, समावेशिता' मा अर्को पक्षको विश्वास गर्न सकिँदैन भन्नुभएको थियो। दस्ताबेजमा यही शब्द किटान गर्न भन्नु भएको थियो।

त्यहाँ तपाईँहरू सही साबित हुनुभयो।

हाम्रो हकमा,

अर्को पक्षको नेतृत्वले लिखित रूपमा ( अग्रगामी, प्रगतिशील, मध्य वामपन्थी, संविधानवादलाई पूर्णतः पालना गर्ने, विगतका आन्दोलनका उपलब्धिलाई रक्षा गर्ने ) र मौखिक रूपमा पनि व्यवस्था विरोधी एजेन्डा नबोक्ने सहमति र गणतन्त्र, सङ्घीयता, धार्मिक स्वतन्त्रता र समावेशिताबारे सहमति जनाउनुभएकोले हामीले उहाँहरूलाई विश्वास गर्ने त्यो निर्णय गर्यौँ।

हामीलाई लाग्यो लिखित रूपमा पनि यत्ति स्पष्ट छ। मौखिक रूपमा पनि सहमति छ। हामी सुसंस्कृत विवेकशील राजनीति गर्दै थियौँ। यसरी लप्पनछप्पन गर्ने कुरा सोच्न सक्ने कुरा भएन। आखिर राजनीति विश्वास न हो। हामीले विश्वास गर्यौँ।

त्यसैले, हामीले लेखेको र भएको सहमतिलाई मान्यौँ।

आज दुखको कुरा के भयो भने सुसंस्कृत राजनीतिमा अर्को पक्षले लेखेकै र भएकै सहमति मान्नु मेरो गल्ती भयो भन्नुपरेको छ।

आज वैकल्पिक राजनीतिमा लप्पनछप्पन नजान्दा यो परिस्थिति आएको हो।

तसर्थ, तत्कालीन हिसाबबाट विवेकशील र साझाको एकीकरणको नेतृत्व मैले गरेको हुँदा म तपाईँहरू १३ जनासँग माफी माग्छु। हाम्रो उद्देश्य पवित्र थियो।

खेर अघि बढौँ। तपाईँहरूलाई शुभकामना। राम्रो गर्नुहोस्।

छिट्टै अभियानमा भेट हुने नै छ। साङ्गठनिक रूपमा पनि छिट्टै नै हामी संगैनै हुनेछौँ।

विवेकशील साझा पार्टीलाई अग्रगामी, प्रगतिशील, संविधानवादलाई पालना गर्ने पार्टी र विगतका आन्दोलनका उपलब्धिलाई जोगाउने पार्टीको रूपमा खडा गर्नेछौँ।

आज विवेकशील साझा पार्टीको हाम्रो पक्ष वैचारिक रूपमा स्पष्ट छ। विवेकशील साझा पार्टी भित्रका सयौँ साथीहरू 'मूल बाटो'मै हुनुहुन्छ। सङ्गठनका हिसाबले पनि पार्टीभित्र 'मूल बाटो' कमजोर छैन। केही कानुनी काम बाकी छन्।

विवेकशील साझा पार्टीको वैचारिक संस्थापन कमजोर छैन। तसर्थ, विवेकशील साझा पार्टीभित्रको वैचारिक लडाई सकिएको छैन। कमजोर भएको पनि छैन।

विवेकशील साझा पार्टीलाई 'प्रोग्रेसिभ डेमोक्रेटिक' पार्टी बनाएर नै छाड्ने हो। आशा छ, तपाईँहरूको साथ पनि हामीलाई हुनेछ।

फेरी पनि, तपाईँहरूलाई शुभकामना छ।

उज्ज्वल दाइले र हामी सबैले देखेको सपना मर्ने छैन। हामी सबै मिलेर हाम्रो त्यो सामूहिक सपना साकार गर्नेछौँ