सरेबुङ पासबाट सम्पर्कविहीन भएका सबै पदयात्री सम्पर्कमा आए

मुस्ताङ : लोघेकर दामोदरकुण्ड–४ याराबाट सरेबुङ पासतर्फ प्रस्थान गरेका १४ जना पदयात्री केहीबेरअघि जिल्ला प्रशासन कार्यालय मुस्ताङको सम्पर्कमा आएका छन्। प्रमुख जिल्ला अधिकारी विष्णुप्रसाद भुसालले जानकारी दिनु भएको छ कि तीन अष्ट्रियन नागरिकसहित सम्पूर्ण टोली सुरक्षित रहेको छ।

यी पदयात्री दुई साताअघि हिमालयन एडभेन्चर ट्राभल्सको व्यवस्थापनमा काठमाडौँबाट सरेबुङ हुँदै मनाङको फु गाउँको पदयात्राका लागि प्रस्थान गरेका थिए। टोली अक्टोबर २६ तारिखमा लोघेकर–४ याराबाट सरेबुङतर्फ प्रस्थान गरेको थियो।

तीन दिनदेखि सम्पर्कविहीन रहेका यस समूहका बारेमा बिहीबार साँझ प्रशासनलाई जानकारी गराइएको थियो। हिमालयन एडभेन्चरका व्यवस्थापक दीपक मैनालीले जानकारी दिनुभयो कि आज बिहान मात्र एक जना पथप्रदर्शकले टेलिफोनमार्फत सम्पर्क गरेका थिए, तर मौसम प्रतिकूल भएकाले स्पष्ट संवाद हुन सकेको थिएन।

सरेबुङ पास समुन्द्री सतहदेखि करिब ६ हजार मिटर उचाइमा रहेको छ। टोली मङ्गलबारदेखि परेको भारी हिमपात र प्रतिकूल मौसमका कारण सम्पर्कविहीन भएको थियो। प्रजिअ भुसालका अनुसार, तीन दिनसम्म टोली दामोदरकुण्ड धर्मशालामा सुरक्षित बसेको जानकारी प्राप्त भएको छ।

धर्मशालामा खाने–बस्ने सुविधा सहित अत्यावश्यक साधनहरू उपलब्ध भएकाले टोलीलाई सुरक्षित रहन सहज भएको थियो। आज साँझ पदयात्रीहरू पैदल यात्रामार्फत यारा गाउँसम्म सुरक्षित रूपमा आइपुगेका छन्।

कात्तिक १४, २०८२ शुक्रबार २१:०८:५० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।