बिहीबारदेखि पूर्वी नेपालमा भारी वर्षाको चेतावनी, धान भित्र्याउन किसानलाई विज्ञको सुझाव
काठमाडौं : पश्चिमी वायुको प्रभावले आज (मंगलबार) बिहानैदेखि पश्चिम नेपालबाट शुरू भएको वर्षाको प्रणाली बिहीबारदेखि पूर्वी नेपालमा थप सक्रिय भई भारी वर्षा गराउने देखिएको छ।
जल तथा मौसम विज्ञान विभाग र मौसमविज्ञहरूले आगामी तीन दिनको मौसमको अवस्था विश्लेषण गर्दै विशेषगरी पूर्वी प्रदेशका किसानहरूलाई धानबाली सुरक्षित गर्न सुझाव दिएका छन्।
आज र भोलि (मंगलबार र बुधबार) देशभर वर्षाको प्रभाव रहने भए पनि पश्चिम र मध्य क्षेत्रमा सामान्यदेखि मध्यम वर्षा हुनेछ।
तर, बिहीबारदेखि यो प्रणाली पूर्वतर्फ सर्दै बागमती, मधेश र कोशी प्रदेशमा केन्द्रित भई भारीदेखि अति भारी वर्षाको सम्भावना रहेको छ।
विज्ञको विश्लेषण: बिहीबारदेखि पूर्वमा जोखिम
त्रिभुवन विश्वविद्यालयका जल तथा मौसम विज्ञान विषयका सह-प्राध्यापक विनोद पोखरेलले बिहीबारदेखि शनिबारसम्मको अवधिमा पूर्वी नेपालमा सतर्कता अपनाउनुपर्ने बताएका छन्।
उनको विश्लेषणअनुसार, बिहीबारदेखि बागमती, मधेश र कोशी प्रदेशमा भारीदेखि अति भारी वर्षा हुनेछ भने गण्डकी र लुम्बिनीमा हल्कादेखि मध्यम वर्षाको सम्भावना छ।
धान भित्र्याउने समय चलिरहेकाले किसानहरूलाई विशेष आग्रह गर्दै उनले भनेका छन्, ‘किसानहरूले धान सुरक्षित राख्नुहोला।’
सार्वजनिक नक्साअनुसार, बिहीबारदेखि विराटनगरमा १८० मिमि, वीरगञ्जमा १०९ मिमि र बर्दिबासमा १०० मिमिभन्दा बढी वर्षा हुने सम्भावना देखिन्छ, जसले काटिसकेको वा काट्न तयार भएको धानबालीमा ठूलो क्षति पुर्याउन सक्छ।
आज र भोलिको अवस्था कस्तो रहन्छ?
जल तथा मौसम विज्ञान विभागले आज (मंगलबार) का लागि जारी गरेको पूर्वानुमानअनुसार दिउँसो देशभरकै मौसममा बदली रहनेछ।
विशेषगरी गण्डकी, लुम्बिनी र कर्णाली प्रदेशका केही स्थानमा मध्यम वर्षा/हिमपातको सम्भावना छ। यसैगरी, बागमती, गण्डकी र कर्णाली प्रदेशका उच्च पहाडी तथा हिमाली भू-भागका एक-दुई स्थानमा भारी हिमपात/वर्षाको पनि चेतावनी दिइएको छ।
आज राति पनि गण्डकी प्रदेशका केही स्थानमा मध्यम वर्षा हुनेछ भने बागमती र गण्डकी प्रदेशका उच्च हिमाली भेगमा भारी हिमपातको सम्भावना कायमै रहने विभागले जनाएको छ।
समग्रमा, मौसम प्रणाली पश्चिमबाट पूर्वतर्फ सर्दै गएकाले आगामी दुई दिन मध्य र पश्चिमका बासिन्दा तथा पदयात्रीले सावधानी अपनाउनुपर्ने र बिहीबारदेखि पूर्वी क्षेत्रका बासिन्दा, विशेषगरी किसानहरूले उच्च सतर्कता अपनाउनुपर्ने देखिएको छ।
कात्तिक ११, २०८२ मंगलबार १०:०९:२८ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
