पाकिस्तानी खेलाडीले बिग ब्यास लिग खेल्न पाउने, बोर्डको रोक हट्यो
काठमाडौं : पाकिस्तानका चर्चित खेलाडीहरूले अष्ट्रेलियाको बिग ब्यास लिग खेल्न पाउने भएका छन्।
पहिले पाकिस्तान क्रिकेट बोर्डले विदेशमा लिग खेल्न जान नदिने बताएपछि उनीहरू खेल्न पाउने हुन् कि होइनन् भन्ने शंका थियो। तर, क्रिकेट अष्ट्रेलियाले सबै खेलाडीलाई खेल्न अनुमति मिलेको पुष्टि गरेको छ।
गत सेप्टेम्बरमा पीसीबी ले आफ्ना खेलाडीलाई विदेशी टी२० लिग खेल्न जान नदिने निर्णय गरेको थियो। तर, क्रिकेट अष्ट्रेलियाका प्रमुख टोड ग्रीनबर्गले पाकिस्तानी खेलाडीहरू तोकिएकै समयमा बीबीएल खेल्न अष्ट्रेलिया आउने पक्का गरेका छन्।
‘पाकिस्तानी खेलाडीहरूले खेल्नका लागि अनुमति पाइसकेका छन्,’ ग्रीनबर्गले भने, ‘हामीसँग बीबीएलमा उत्कृष्ट पाकिस्तानी खेलाडीहरू छन्, त्यसैले उनीहरूलाई यो सिजन हेर्न हामी निकै उत्साहित छौँ।’
यस सिजन बीबीएल मा बाबर आजम, शाहिन शाह अफ्रिदी, हसन अली, मोहम्मद रिजवान, हरिस रउफ र शादाब खान जस्ता स्टार खेलाडीहरूले विभिन्न टिमबाट खेल्दैछन्। प्रतियोगिता डिसेम्बर १४ देखि शुरू हुँदैछ।
भारतीय खेलाडी पनि बीबीएलको आकर्षणमा
यसपटक बीबीएल मा भारतीय स्टार खेलाडी रविचन्द्रन अश्विन पनि खेल्दैछन्। उनको आगमनले भविष्यमा विराट कोहली जस्ता अरू भारतीय खेलाडी पनि आफ्नो करियरको अन्तिमतिर बीबीएल मा आउन सक्ने चर्चा चलेको छ।
ग्रीनबर्गले भने, ‘भविष्यमा अरू भारतीय खेलाडी पनि आउन सक्छन्, हामी यसबारे कुराकानी गरिरहनेछौँ।’
अष्ट्रेलियालाई आफ्नै खेलाडी जोगाउने चिन्ता
बीबीएल लाई विश्वकै उत्कृष्ट लिग बनाउन निजी लगानी भित्र्याउनेबारे पनि कुराकानी भइरहेको छ। किनभने, राम्रा खेलाडीलाई आकर्षित गर्न धेरै पैसा चाहिन्छ।
अष्ट्रेलियाका आफ्नै खेलाडीलाई बीबीएल मै टिकाइराख्नु पनि एउटा चुनौती हो। हालै अष्ट्रेलियाका कप्तान प्याट कमिन्स र ट्राभिस हेडले आईपीएल फ्रेन्चाइजको करोडौँको अफर अस्वीकार गरेका थिए।
ग्रीनबर्गका अनुसार, अहिलेका खेलाडीले देशबाटै खेल्न चाहे पनि नयाँ पुस्ताका खेलाडीलाई पैसाको लागि विदेशी लिगले तान्न सक्ने चिन्ता छ।
‘हामीले नयाँ पुस्तालाई अष्ट्रेलियामै राख्ने उपाय खोज्नुपर्छ’, उनले भने।
कात्तिक ८, २०८२ शनिबार १२:०२:५६ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
