हुन्डाईको आयोनिक ९ ले जित्यो ‘जर्मन प्रिमियम कार अफ द इयर २०२६’ को उपाधि

काठमाडौं : हुन्डाईको पूर्ण-विद्युतीय फ्ल्यागसिप एसयूभी, आयोनिक ९ ले प्रतिष्ठित ‘जर्मन प्रिमियम कार अफ द इयर २०२६’ को उपाधि जितेको छ।

बजारमा आएको तीन महिनामै यो सफलता हात पारेसँगै हुन्डाईले विश्वव्यापी प्रिमियम विद्युतीय गाडी बजारमा आफ्नो बलियो उपस्थिति जनाएको छ।

४० जना प्रमुख अटोमोटिभ पत्रकारहरूको स्वतन्त्र निर्णायक मण्डलले आयोनिक ९ लाई यो उपाधि प्रदान गरेको हो। यसले बलिया प्रतिस्पर्धीहरूलाई पछि पार्दै आफ्नो आकर्षक एरोडाइनामिक डिजाइन, अत्याधुनिक ८००-भोल्ट फास्ट-चार्जिङ प्रणाली र लाउन्जजस्तै अनुभव दिने विलासी तीन-पङ्क्तिको भित्री बनावटका लागि प्रशंसा बटुल्यो। निर्णायक मण्डलले यसको फराकिलो बनावट, प्राविधिक उत्कृष्टता र मानव-केन्द्रित आरामदायी सुविधाको विशेष प्रशंसा गरेको थियो।

हुन्डाई मोटर युरोपका अध्यक्ष तथा सीईओ जेभियर मार्टिनेटले भने, ‘आयोनिक ९ ले हाम्रो नवीन डिजाइन, प्रगतिशील सोच र मानव-केन्द्रित दिगो यातायातप्रतिको प्रतिबद्धतालाई दर्शाउँछ। यस्ता पुरस्कारहरूले हामी सही बाटोमा छौँ भन्ने पुष्टि गर्छ र हामीलाई हरेक ड्राइभमा आत्मविश्वास र गर्व महसुस गराउने विद्युतीय गाडीहरू बनाउन प्रेरित गर्छ।’

हुन्डाईको ई-जीएमपी प्लेटफर्ममा निर्मित यो गाडीले प्रिमियम विद्युतीय गाडीको प्रदर्शन, प्रविधि र दक्षतामा नयाँ मापदण्ड स्थापित गरेको छ। यसमा रहेको अल्ट्रा-फास्ट चार्जिङ प्रविधिले गाडीलाई मात्र २४ मिनेटमा १० देखि ८० प्रतिशतसम्म चार्ज गर्न सक्छ भने एक पटकको फुल चार्जमा ५०० किलोमिटरभन्दा बढीको ड्राइभिङ रेन्ज प्रदान गर्दछ।

यसमा एआई-समर्थित भ्वाइस रिकग्निसन सहितको पछिल्लो कनेक्टेड कार नेभिगेसन ककपिट (ccNC) र दिगो सामग्रीको प्रयोग गरिएको छ, जसले वातावरणीय जिम्मेवारीप्रतिको हुन्डाईको प्रतिबद्धतालाई उजागर गर्छ।

आयोनिक ९ को यो विश्वव्यापी सफलताले नेपालमा विद्युतीय यातायात प्रवर्द्धन गर्ने हुन्डाईको अभियानलाई थप बल दिएको छ। नेपालमा कोना ईभी र आयोनिक ५ जस्ता मोडलहरूले विद्युतीय गाडी बजारमा पहिले नै नेतृत्व गरिरहेका छन्। लक्ष्मी इन्टरकन्टिनेन्टल प्रा. लि. मार्फत स्थानीय स्तरमा गाडी एसेम्बल गर्ने क्षमताका साथ हुन्डाई नेपालले विश्व-स्तरीय विद्युतीय गाडीहरू नेपाली उपभोक्ताका लागि थप पहुँचयोग्य बनाउन निरन्तर काम गरिरहेको छ।

‘जर्मन कार अफ द इयर’ युरोपको सबैभन्दा सम्मानित अटोमोटिभ पुरस्कारहरू मध्ये एक हो। यसमा करिब ४० जना स्वतन्त्र मोटर पत्रकारहरूले गत वर्ष सार्वजनिक भएका नयाँ गाडीहरूलाई कम्प्याक्ट, प्रिमियम, लक्जरी, न्यू इनर्जी र पर्फमेन्स गरी पाँच विधामा मूल्याङ्कन गर्छन्। प्रिमियम विधामा आयोनिक ९ को जितले विद्युतीय गाडी बजारमा हुन्डाईको विश्वव्यापी नेतृत्वलाई प्रमाणित गरेको छ।

असोज ३१, २०८२ शुक्रबार ११:२४:५४ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।