पीएनजीसँगको जितसँगै आईसीसी वरीयतामा सामोआको छलाङ

एजेन्सी : आईसीसी टी-२० विश्वकप छनोटमा पपुवा न्यू गिनी (पीएनजी) विरुद्धको ऐतिहासिक जितले सामोआको आईसीसी वरीयतामा ठूलो उथलपुथल ल्याएको छ।

खेलअघि ६९औं स्थानमा रहेको सामोआले यो सनसनीपूर्ण जितसँगै एकैपटक पाँच स्थान माथि उक्लँदै ६४औं स्थानमा पुगेर वरीयतामा ऐतिहासिक छलाङ मारेको हो।

अर्कोतर्फ, अप्रत्याशित हार व्यहोरेको २१औं वरीयताको बलियो टोली पीएनजी एक स्थान तल झर्दै २२औं स्थानमा पुगेको छ।

एसोसिएट क्रिकेटको राम्रै मानिने पीएनजीमाथिको यो जितले सामोआलाई अंक मात्र दिलाएन, वरीयतामा समेत सम्मानजनक सुधार दिलाएको छ।

अल अमारातमा भएको खेलमा सामोआको यो जित वरीयता परिवर्तन गर्ने एउटा महत्त्वपूर्ण कारक बन्यो।

‘प्लेयर अफ द म्याच’ सिन सोलियाको अविजित ६२ रनको उत्कृष्ट अर्धशतकीय पारीको मद्दतले सामोआले ११८ रनको लक्ष्य ९ बल बाँकी छँदै सफलतापूर्वक पूरा गरेको थियो।

उनको विस्फोटक ब्याटिङले वरीयतामा ४८ स्थान माथि रहेको पीएनजीलाई घुँडा टेकाउन बाध्य बनायो।

यसअघि, सोलोमन न्यासको घातक बलिङले पीएनजीलाई ठूलो स्कोर बनाउनबाट रोकेको थियो।

न्यासले मात्र २४ रन खर्चेर ४ विकेट लिएपछि पीएनजी ११७ रनमै समेटिएको थियो, जसले सामोआको जित र वरीयतामा सुधारको आधार तयार पारेको थियो।

यो जितले सामोआलाई २ अंक मात्र दिलाएको छैन, वरीयतामा सुधारसँगै टोलीको मनोबल पनि उच्च बनाएको छ।

यस नतिजाले समूह ‘सी’को सुपर सिक्स समीकरणलाई थप रोमाञ्चक बनाएको छ, जहाँ पीएनजीले अब घरेलु टोली ओमानविरुद्ध निर्णायक खेल खेल्नुपर्नेछ।

असोज २४, २०८२ शुक्रबार ०९:०८:३४ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।