बेलायतका प्रधानमन्त्री स्टारमरले भने- भारतका लागि भिसा नियमहरू खुकुलो पार्न सकिँदैन

एजेन्सी : बेलायती प्रधानमन्त्री केयर स्टारमरले बेलायतले आफ्नो भिसा नियमहरू भारतका लागि खुकुलो नपार्ने बताएका छन्।

भारत र बेलायतबीच हालै भएको स्वतन्त्र व्यापार सम्झौतापछि प्रधानमन्त्री स्टारमर बुधबार भारत आइपुगेका छन्। भारत आउनुअघि उनले यस्तो बयान दिएका हुन्।

बेलायतमा लगानी बढाउने र आर्थिक वृद्धि सुधार गर्ने लक्ष्यका साथ प्रधानमन्त्री स्टारमर १०० भन्दा बढी उद्यमी, सांस्कृतिक व्यक्तित्व र विश्वविद्यालयका उपकुलपतिहरूको प्रतिनिधिमण्डलसँग भारतमा छन्।

प्रधानमन्त्री स्टारमरले भारतसँग व्यापार र सांस्कृतिक सम्बन्धलाई सुदृढ पार्न ‘प्रचुर अवसरहरू’ रहेको बताए। यद्यपि, उनले भारतीय कामदार वा विद्यार्थीहरूको लागि भिसा नियमहरूलाई थप खुकुलो बनाउने कुनै योजना नभएको स्पष्ट पारे।

‘मुद्दा भिसाको बारेमा होइन। यो व्यापार, लगानी, रोजगारी र बेलायतमा समृद्धि ल्याउने बारेमा हो’, स्टारमरले भने।

धेरै वर्षको वार्तापछि यस वर्ष जुलाईमा भारत र बेलायतबीच स्वतन्त्र व्यापार सम्झौतामा हस्ताक्षर भएको थियो।

यस सम्झौता अन्तर्गत, बेलायती कार र ह्विस्की सस्तो दरमा भारत निर्यात गर्न सकिन्छ भने भारतीय कपडा र गहना कम मूल्यमा बेलायत पठाउन सकिन्छ। यसले दुई देशहरू बीच अर्बौं पाउन्ड व्यापार लाभ उत्पन्न गर्नेछ।

सम्झौतामा बेलायतमा छोटो अवधिको भिसामा काम गर्ने भारतीय कर्मचारीहरूलाई तीन वर्षको लागि सामाजिक सुरक्षा शुल्कबाट छुट दिने व्यवस्था पनि गरिएको छ।

यद्यपि, मन्त्रीहरूले अध्यागमन नीतिमा कुनै ठूलो परिवर्तन नगरिएको बताए।

असोज २२, २०८२ बुधबार १०:५७:४२ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।