यी हुन् देशभर अवरुद्ध रहेका राजमार्गहरू (सूचीसहित)

काठमाडौं : अविरल वर्षा र त्यसपछिको बाढी तथा पहिरोका कारण कोशी र बागमती प्रदेशका विभिन्न मुख्य राजमार्गहरू पूर्ण रूपमा अवरुद्ध भएका छन्, जसले गर्दा सर्वसाधारणको यात्रा कष्टकर बनेको छ।

नेपाल प्रहरीले आज (असोज २० गते) बिहान ६:४० बजे सार्वजनिक गरेको तथ्याङ्कअनुसार यी दुई प्रदेशका दर्जनभन्दा बढी स्थानमा सडक अवरुद्ध भएको हो।

प्रहरीका अनुसार, कोशी प्रदेशमा संखुवासभा, ओखलढुंगा, उदयपुर, धनकुटा र इलाम जिल्लाका सडकखण्डहरू प्रभावित भएका छन्।

संखुवासभाको भोटखोला र मकालु गाउँपालिकामा कोशी राजमार्ग, ओखलढुंगाको मानेभञ्ज्याङमा सिद्धिचरण लोकमार्ग र उदयपुरको कटारीमा सिद्धिचरण लोकमार्ग वर्षा र बाढीका कारण पूर्ण रूपमा बन्द छन्।

यस्तै, धनकुटा र इलाममा पनि मध्यपहाडी लोकमार्ग, कोशी लोकमार्ग र मेची राजमार्गका विभिन्न स्थानमा यातायात ठप्प छ।

यसैगरी, बागमती प्रदेशमा पनि पहिरोका कारण जनजीवन कष्टकर बनेको छ। रसुवा, सिन्धुपाल्चोक, काभ्रेपलाञ्चोक, मकवानपुर र सिन्धुली जिल्लाका सडकहरू अवरुद्ध छन्।

रसुवामा नेपाल र चीन नाका जोड्ने पुल नै अवरुद्ध हुँदा आवतजावत रोकिएको छ भने पासाङ ल्हामु सडक खण्डमा पनि पहिरो खसेको छ।

सिन्धुपाल्चोकको भोटेकोशीमा अरनिको राजमार्ग, काभ्रेको रोशीमा बि.पी. राजमार्ग र मकवानपुरमा कान्ति लोकपथका साथै कुलेखानी-सिस्नेरी-दक्षिणकाली सडकखण्ड पनि पूर्ण रूपमा अवरुद्ध भएका छन्।

यद्यपि, सिन्धुलीको मरिण गाउँपालिकास्थित मदन भण्डारी राजमार्ग भने एकतर्फी रूपमा सुचारु रहेको प्रहरीले जनाएको छ।

अधिकांश सडकहरू ‘पूर्ण रूपमा अवरोध’को अवस्थामा रहेकाले यात्रुहरूलाई यात्रा गर्नुअघि सडकको अवस्थाबारे जानकारी लिन नेपाल प्रहरीले आग्रह गरेको छ।

असोज २०, २०८२ सोमबार ०७:३०:०८ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।