हमास शान्तिका लागि तयार रहेको ट्रम्पको घोषणा, तुरुन्त आक्रमण रोक्न इजरायललाई आग्रह

एजेन्सी : अमेरिकी राष्ट्रपति डोनाल्ड ट्रम्पले शुक्रबार हमास स्थायी शान्तिका लागि तयार रहेको घोषणा गर्दै इजरायललाई गाजामा तत्काल आक्रमण रोक्न पहिलो पटक आग्रह गरेका छन्। गाजा युद्ध अन्त्य गर्ने आफ्नो प्रस्तावमा आतंकवादी समूह हमासले दिएको प्रतिक्रियालाई ट्रम्पले पूर्ण रूपमा स्वागत गरेको देखिन्छ।

ट्रम्पको यो सन्देश हमासले आफ्नो प्रतिक्रिया सार्वजनिक गरेलगत्तै आएको हो। हमासले अमेरिकी प्रस्तावका केही अंशहरूलाई स्वागत गरेको छ भने अन्य बुँदाहरूमा थप वार्ता आवश्यक रहेको संकेत गरेको छ।

हमासले आफ्नो विज्ञप्तिमा भनेको छ कि स्थायी युद्धविराम लागू भएको ७२ घण्टाभित्र इजरायलले गाजाबाट पहिलो चरणको सेना फिर्ता गरेपछि बाँकी रहेका सबै ४८ बन्धकहरूलाई रिहा गर्न तयार छ। यसको बदलामा दुई हजार भन्दा बढी प्यालेस्टिनी सुरक्षा बन्दी र मारिएका गाजावासीहरूको शव फिर्ता गर्नुपर्ने उसको माग छ।

तर, हमासले "बन्दी आदानप्रदान कार्यान्वयनका लागि आवश्यक जमीनी अवस्था" सिर्जना भएपछि मात्र बन्धकहरूलाई रिहा गरिने सर्त राखेको छ। विज्ञहरूले यसलाई ७२ घण्टाभित्र सबै बन्धकहरू (जसमध्ये २० जना मात्र जीवित रहेको विश्वास छ) लाई रिहा गर्न नसकिने संकेतको रूपमा हेरेका छन्। हमासले यसअघि पनि मारिएका केही बन्धकहरूको शव कहाँ छ भन्ने आफूलाई थाहा नभएको बताएको थियो।

इजरायलको प्रतिक्रिया र सेनाको कदम
हमासको प्रतिक्रियापछि प्रधानमन्त्री बेन्जामिन नेतान्याहुको कार्यालयले एक विज्ञप्ति जारी गर्दै ट्रम्पको योजनाको पहिलो चरण तत्काल कार्यान्वयन गर्न र सबै बन्धकहरूलाई रिहा गर्न इजरायल तयार छ भनेको छ।

विज्ञप्तिमा ट्रम्पको पछिल्लो घोषणा वा इजरायललाई आक्रमण रोक्न गरिएको आग्रहबारे केही उल्लेख छैन। यद्यपि, इजरायली सञ्चारमाध्यमहरूले अमेरिकी राष्ट्रपतिको बयानपछि राजनीतिक नेतृत्वले इजरायली रक्षा बल (IDF) लाई गाजा शहरमाथिको आक्रमण रोक्न आदेश दिएको रिपोर्ट गरेका छन्। सेनालाई न्यूनतम रक्षात्मक कारबाहीमा मात्र सीमित रहन निर्देशन दिइएको छ।

वार्ताका मुख्य अड्चनहरू
हमासका एक वरिष्ठ अधिकारी मुसा अबु मरजुकले अल जजीरासँग कुरा गर्दै ७२ घण्टामा ४८ बन्धक फिर्ता गर्ने कुरा अव्यावहारिक भएको तर ट्रम्पको योजनाका अधिकांश बुँदाहरूमा आफूहरू सहमत रहेको बताए।

तर, सम्झौतामा रहेका मुख्य अड्चनहरू कायमै छन्। अमेरिकी प्रस्तावमा हमासले हतियार बिसाउनुपर्ने उल्लेख छ, जसलाई हमासले अस्वीकार गर्दै आएको छ। मरजुकले इजरायली कब्जा अन्त्य नभएसम्म हतियार नबिसाउने र भविष्यको प्यालेस्टिनी राज्यलाई मात्र हतियार हस्तान्तरण गर्ने स्पष्ट पारेका छन्। साथै, हमासले गाजाको भविष्यको शासनमा आफ्नो भूमिका खोजेको छ, जुन अमेरिकी प्रस्तावको विपरित छ।

ट्रम्पको उत्साह र अन्तर्राष्ट्रिय स्वागत
ट्रम्पले हमासको प्रतिक्रियालाई निकै सकारात्मक रूपमा लिएका छन्। उनले आफ्नो 'ट्रुथ सोसल' प्लेटफर्ममा लेखेका छन्, ‘मलाई विश्वास छ, उनीहरू स्थायी शान्तिका लागि तयार छन्। बन्धकहरूलाई सुरक्षित रूपमा बाहिर निकाल्न इजरायलले तुरुन्तै गाजामा बमबारी रोक्नुपर्छ।’

एक भिडियो सन्देशमा उनले मध्यपूर्वमा शान्ति स्थापना हुन लागेको भन्दै कतार, टर्की, साउदी अरेबिया, इजिप्ट लगायतका देशहरूलाई धन्यवाद दिए। उनले भने, "यो एक ठूलो दिन हो। हामी अन्तिम सहमतिलाई ठोस रूप दिनुपर्छ।"

यसैबीच, बन्धकका परिवारहरूको फोरम, कतार र इजिप्टले ट्रम्पको कदम र हमासको प्रतिक्रियाको स्वागत गरेका छन्। उनीहरूले तत्काल युद्धविराम गरी बन्धकहरूको सुरक्षित रिहाइको वातावरण बनाउन आग्रह गरेका छन्। रिपोर्टहरूका अनुसार, ट्रम्पको यस्तो सकारात्मक प्रतिक्रियाले प्रधानमन्त्री नेतान्याहु भने चकित परेका थिए, किनभने उनले हमासको प्रतिक्रियालाई सम्झौताको अस्वीकारको रूपमा हेरेका थिए।

असोज १८, २०८२ शनिबार ०७:५९:२८ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।