इजरायलविरुद्ध कतारमा ५० मुस्लिम देशको आपत्कालीन बैठक, पाकिस्तान र इरानद्वारा संयुक्त सैन्य बल बनाउने प्रस्ताव
एजेन्सी : कतारको राजधानी दोहामा इजरायलविरुद्ध कडा कदम चाल्ने उद्देश्यले ५० भन्दा बढी मुस्लिम देशका नेताहरू आज एक आपत्कालीन बैठकका लागि भेला भएका छन्।
अरब लीग र इस्लामिक सहयोग सङ्गठनले संयुक्त रूपमा आयोजना गरेको यो बैठकको मुख्य उद्देश्य गत सेप्टेम्बर ९ मा दोहामा भएको इजरायली हमलाको जवाफ तयार पार्नु हो।
उक्त हमलामा हमासका ५ सदस्य र एक कतारी सुरक्षा अधिकारीको मृत्यु भएको थियो। यो हमला त्यतिबेला भएको थियो, जब हमासको एक टोली गाजामा जारी युद्ध अन्त्य गर्ने अमेरिकी प्रस्तावमा छलफल गर्न दोहामा थियो।
इरान र पाकिस्तानको कडा प्रस्ताव
बैठकअघि नै मुस्लिम देशहरूबाट कडा प्रतिक्रिया आउन थालेको छ। इरानका राष्ट्रपति मसूद पजशकियानले सबै मुस्लिम राष्ट्रहरूलाई इजरायलसँगको सम्बन्ध तोड्न र एकजुट हुन आह्वान गरेका छन्।
यसैगरी, पाकिस्तानले नेटो जस्तै मुस्लिम देशहरूको एउटा संयुक्त सैन्य बल बनाउनुपर्ने प्रस्ताव राखेको छ। पाकिस्तानका विदेशमन्त्री मोहम्मद इशाक डारले आणविक शक्तिसम्पन्न राष्ट्रको हैसियतले पाकिस्तान इस्लामिक समुदाय (उम्माह) को रक्षाका लागि आफ्नो जिम्मेवारी पूरा गर्न तयार रहेको बताए।
के थियो सेप्टेम्बर ९ को हमला?
इजरायलले सेप्टेम्बर ९ मा कतारको राजधानी दोहामा हमासका वरिष्ठ नेता खलील अल-हय्यालाई निशाना बनाएर हवाई हमला गरेको थियो।
उक्त हमलामा अल-हय्या बाँच्न सफल भए पनि ६ जनाको मृत्यु भएको थियो। इजरायली प्रधानमन्त्री बेन्जामिन नेतान्याहुले पछि हमलाको ‘पूर्ण जिम्मेवारी’ लिएको घोषणा गरेका थिए।
यो हमलापछि कतारले कडा शब्दमा निन्दा गर्दै यसलाई आफ्नो ‘सार्वभौमसत्तामाथिको आक्रमण’ र ‘कायरतापूर्ण कार्य’ भनेको थियो।
कतारका प्रधानमन्त्री शेख मोहम्मद बिन अब्दुलरहमान अल थानीले आफ्नो देशको सार्वभौमिकता रक्षाका लागि आवश्यक कदम चाल्ने चेतावनी दिएका थिए।
इजरायलद्वारा आफ्नो कदमको बचाउ
अर्कोतिर, इजरायलले उक्त हमलालाई सही ठहर्याउँदै आएको छ। संयुक्त राष्ट्र सङ्घको महासभामा इजरायली राजदूत ड्यानी ड्याननले उक्त हमला आतंकका मुख्य योजनाकारहरूलाई लक्षित गरेर गरिएको सटीक कारबाही भएको बताए।
उनले भने, ‘उनीहरू कुनै राजनेता वा कूटनीतिज्ञ होइनन्, बरु आतंकका योजनाकार थिए, जसले ७ अक्टोबर २०२३ मा इजरायलमा नरसंहार मच्चाएका थिए।’
इजरायलका अर्थमन्त्री बेजलेल स्मोट्रिचले पनि हमलाको प्रशंसा गर्दै "आतंकवादीहरूले संसारको कुनै पनि कुनामा उन्मुक्ति नपाउने" चेतावनी दिएका थिए।
यो बैठकलाई विश्वभरका मुस्लिम समुदायले चासोका साथ हेरिरहेका छन् र यसले इजरायलविरुद्ध कुनै ठोस कदम चाल्ने अपेक्षा गरिएको छ।
भदौ ३१, २०८२ मंगलबार ०८:२३:०८ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
