खण्डहर भएका प्रहरी प्रभाग, न अपराधका फाइल रहे न त लत्ताकपडा र खाना (तस्विरहरू)
काठमाडौं : जेनजी आन्दोलनबाट काठमाडौंका प्रहरी प्रभागहरू पनि बच्न सकेनन्। आगलागीका कारण काठमाडौंका अधिकांश प्रहरी प्रभागहरू खण्डहर भए।
सोमबार १९ जनाको मृत्यु भएको घटनापछि मंगलबार आक्रोशित प्रदर्शनकारीले रानीपोखरी, दरबारमार्ग, महाराजगञ्जदेखि बग्गीखानासम्मका प्रहरी कार्यालय जलाइदिए। अहिले प्रहरीहरू आफैंले भग्नावशेष उठाउँदै छन्।
आज बिहानैदेखि प्रहरी र स्थानीय बासिन्दाहरूले जलेर बाँकी रहेको फर्निचर, खरानी, भत्किएका ईँटा, तारसमेत संकलन गरेर कार्यालयलाई सामान्य बनाउन खोजिरहेका छन्। तर त्यो सहज छैन। कागजपत्रदेखि अपराधको फाइलसम्म सबै डढिसकेका छन्।
दरबारमार्गमा खटिएका एक जवान नाम नखुलाउने सर्तमा भन्छन्, “सुत्ने ठाउँ त जसोतसो मिल्यो, तर खाने चिज छैन, लगाउने लत्ताकपडा छैन। हाम्रा विद्युतीय उपकरणदेखि अपराध रेकर्ड सबै डढाइएको छ।”
त्यहाँ पुग्दा केही प्रहरी युनिफर्म धोइरहेका देखिन्छन्। खानपिनका लागि स्थानीयले सहयोग गरिरहेका छन्। कतिपय प्रहरी परिवारले त किचनमा पकाएको खाना बोकेर प्रभागसम्म पुर्याइरहेका छन्।
जेनजी आन्दोलन सोमबार काठमाडौं उपत्यकाबाट सुरु भए पनि अहिले देशभर फैलिएको छ। पहिलो दिनै भिड र सुरक्षाकर्मीबीचको झडपमा १९ जनाको ज्यान गएपछि मंगलबार आन्दोलन हिंसात्मक बनेको थियो। देशभरका सरकारी भवनहरू आन्दोलनकारीको मुख्य निशानामा परे।
भदौ २६, २०८२ बिहीबार २०:५९:४७ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
