कर्णालीमा कारागार विद्रोह : भागेका ४७ कैदी पक्राउ, डोल्पामा ग्यास सिलिन्डर पड्काएर भाग्ने प्रयास असफल

सुर्खेत : कर्णाली प्रदेशका रुकुम पश्चिम र जुम्ला जिल्ला कारागारबाट भागेका कैदीबन्दीमध्ये ४७ जनालाई प्रहरीले पक्राउ गरेको छ।

मंगलबार 'जेन-जी' आन्दोलनको मौका छोपेर भएका जेलब्रेकका घटनापछि डोल्पामा भने कैदीहरूले ग्यास सिलिन्डर नै पड्काएर भाग्ने प्रयास गरेका छन्, जसलाई सुरक्षाकर्मीले असफल पारेका छन्।

जिल्ला प्रहरी कार्यालय रुकुम पश्चिमका सूचना अधिकारी, प्रहरी निरीक्षक हरिबहादुर पुनका अनुसार, मंगलबार साँझ ढोका फोडेर भागेका ८८ जना कैदीबन्दीमध्ये ४५ जनालाई पुनः नियन्त्रणमा लिइएको छ।  रुकुम कारागारमा कुल १५८ जना कैदीबन्दी थिए।

‘बाँकी ४३ जनाको तीव्र खोजी भइरहेको छ’, उनले भने।

यसैगरी, जिल्ला कारागार जुम्लाबाट मंगलबार राति भागेका ३६ जनामध्ये दुई जनालाई पक्राउ गरिएको जिल्ला प्रहरी प्रमुख, डीएसपी रबिन बाबु रेग्मीले जानकारी दिए।

उनका अनुसार, फरार रहेका अन्य ३४ जनाको खोजी भइरहेको छ। डिउटीमा रहेका सुरक्षाकर्मीमाथि हातपात गर्दै कैदीहरूले कारागारभित्रकै हतियार र दाउरा प्रयोग गरी ढोका तोडेका थिए।

डोल्पामा भने कैदीबन्दीले बुधबार दिउँसो दुईवटा ग्यास सिलिन्डर पड्काएर भाग्ने सनसनीपूर्ण प्रयास गरे। तर, उक्त प्रयासलाई नेपाली सेना, सशस्त्र प्रहरी र नेपाल प्रहरीको संयुक्त टोलीले तत्कालै असफल पारेको थियो। कैदीहरूले केही समय आफ्नो रिहाइको माग गर्दै नाराबाजी समेत गरेका थिए।

देशव्यापी रूपमा देखिएको यो कारागार विद्रोहको शृंखलालाई नख्खु कारागारबाट गृहमन्त्री रवि लामिछानेको विवादास्पद रिहाइसँग जोडेर हेरिएको छ।

उक्त घटनाले अन्य कैदीबन्दीहरूमाझ असमानताको भावना पैदा गर्दा देशभरका कारागारहरूमा विद्रोहको लहर सुरु भएको हो, जसले राज्यको सुरक्षा व्यवस्थामा गम्भीर चुनौती थपेको छ।

कर्णालीका अन्य जिल्लाका कारागारहरू भने शान्तिपूर्ण रहेको प्रहरीले जनाएको छ। हाल सबै कारागारहरूको सुरक्षा व्यवस्था नेपाली सेना, सशस्त्र प्रहरी र नेपाल प्रहरीले संयुक्त रूपमा गरिरहेका छन्।

भदौ २५, २०८२ बुधबार १८:२५:४७ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।