बानेश्वरमा प्रदर्शनकारीले जलाए मानव अधिकार आयोगको गाडी
काठमाडौं : नयाँ बानेश्वरमा जारी जेनजी आन्दोलनमा राष्ट्रिय मानव अधिकार आयोगको गाडीमाथि आक्रमण गरी आगो लगाइएको छ।
दुई जनाको मृत्यु र सयौं घाइते भएपछि मानव अधिकारको अवस्था अनुगमन गर्न घटनास्थल पुगेको आयोगको टोली नै आक्रमणको निशानामा परेको हो।
घटना बानेश्वरस्थित एभरेष्ट होटल अगाडि भएको हो। आयोगको गाडीलाई प्रदर्शनकारीको भीडले रोकेर सरकार र प्रहरी दमनविरुद्ध नाराबाजी गरेको थियो।
लगत्तै आक्रोशित समूहले गाडीमा रहेको आयोगको झण्डा निकालेर फाल्दै गाडीमाथि तोडफोड सुरु गरेको थियो। अन्ततः उनीहरूले गाडीमा आगो लगाइदिए।
यसअघि प्रदर्शनकारीले संसद भवनको गेट र एउटा एम्बुलेन्समा आगजनी गरिसकेका छन्। प्रहरीको गोली लागेर दुई जनाको मृत्यु भइसकेको छ भने सयौं घाइते भएका छन्।
भदौ २३, २०८२ सोमबार १५:३५:५३ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
