चीनको भिक्ट्रि परेडमा सहभागी हुँदै प्रधानमन्त्री ओली
काठमाडौं : प्रधानमन्त्री केपी शर्मा ओली आज जापानी उपनिवेश पराजित भएको ८०औँ वर्षको अवसरमा बेइजिङमा आयोजित सैन्य परेडमा सहभागी हुँदैछन्।
चीनले दोस्रो विश्वयुद्धमा जापानमाथि विजयको ८०औं वार्षिकोत्सवका अवसरमा आज आयोजना गर्ने सैन्य परेडको भव्य तयारी गरेको छ। २६ राष्ट्र तथा सरकार प्रमुखका साथै विश्वभरबाट निम्त्याइएका ५० हजार पाहुना उपस्थित हुने सैन्य परेडका लागि बेइजिङको सुरक्षा व्यवस्था कडा पारिएको छ।
परेडका लागि तियानमेन स्क्वयारलाई भव्य रुपमा सजाइएको छ भने राजधानीभर २ लाखभन्दा बढी झण्डा टाँगिएका छन्। यस्तै जापानविरूद्धको युद्धलाई देखाउने फूलका संरचना प्रमुख सडक र चोकमा राखिएका छन्। व्यापारिक क्षेत्रका भवन उज्यालो पार्न नयाँ लाइटस्केप समेत तयार गरिएको छ।
परेडका लागि विद्यालय, व्यापारिक प्रतिष्ठान र होटलहरू दुई दिनका लागि बन्द गरिएका छन्। सडक, ओभरपास र पुलहरूमा चौबिसै घण्टा सुरक्षाकर्मी तैनाथ गरिएको छ भने विदेशी पत्रकारलाई पनि निगरानी गरिएको छ।
परेडमा प्रधानमन्त्री केपी शर्मा ओलीसहित रुसी राष्ट्रपति भ्लादिमिर पुटिन, उत्तर कोरियाली नेता किम जोङ(उनलगायतका नेताहरू सहभागी हुनेछन्। उत्तर कोरियाली नेता सन् १९५९ पछि पहिलोपटक चिनियाँ सैन्य परेडमा सहभागी हुँदैछन्।
सन् १९३० को सुरुमै जापानले चीनमाथि आक्रमण गरेको थियो। जापान, जर्मनी र इटालीको एक्सिस गठबन्धन अघि बढ्दै थियो। तर, अमेरिका, तत्कालीन सोभियत संघ, बेलायत र फ्रान्ससहितको एलाइड गठबन्धनले एक्सिसलाई पराजित गर्दै लगेको थियो।
त्यसैमा सन् १९४५ सेप्टेम्बर ३ मा चीनको प्रतिरोध र अमेरिकी आक्रमणपछि जापान पछि हट्यो। त्यसैदिनको सम्झनामा चीनले हरेक सेप्टेम्बर ३ मा विशेष कार्यक्रम गर्दै आएको छ। पश्चिमा मुलुकहरूबाट भने सर्बिया र स्लोभाकियाका नेताहरू मात्र उपस्थति हुनेछन्।
परेडका क्रममा नयाँ हाइपरसोनिक मिसाइल तथा मानवरहित पानीमुनि चल्ने ड्रोनलगायतका १ सय किसिमका आधुनिक हतियार प्रणाली प्रदर्शन गरिने बताइएको छ। यो परेड चिनियाँ राष्ट्रपति सी चिनफिङको शक्ति र प्रभाव प्रदर्शन गर्ने अवसरका रूपमा रहेको अन्तर्राष्ट्रिय सञ्चारमाध्यमले टिप्पणी गरेका छन्।
भ्रमण सकेर प्रधानमन्त्री ओली नेतृत्वको टोली आजै स्वदेश फर्किने छ।
भदौ १८, २०८२ बुधबार ०७:४०:५३ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
