मिचेल स्टार्कले टी-२० अन्तर्राष्ट्रिय क्रिकेटबाट सन्यासको घोषणा, टेस्ट र एकदिवसीयमा केन्द्रित हुने
सिड्नी : अस्ट्रेलियाका तीव्र गतिका बलर मिचेल स्टार्कले टी-२० अन्तर्राष्ट्रिय क्रिकेटबाट सन्यासको घोषणा गरेका छन्।
३५ वर्षीय स्टार्कले सन् २०२६ को अन्त्यबाट सुरु हुने अस्ट्रेलियाको व्यस्त टेस्ट तालिका र सन् २०२७ मा हुने एकदिवसीय विश्वकपलाई प्राथमिकता दिन यो निर्णय लिएका हुन्।
स्टार्कले आफ्नो टी-२० करियरमा ६५ अन्तर्राष्ट्रिय खेल खेल्दै ७९ विकेट लिए। उनी अस्ट्रेलियाका लागि टी-२० मा सर्वाधिक विकेट लिने दोस्रो बलर हुन्।
उनको उत्कृष्ट प्रदर्शन सन् २०२२ मा वेस्ट इन्डिजविरुद्ध २० रन दिएर ४ विकेट लिनु थियो। स्टार्क सन् २०२१ मा यूएईमा टी-२० विश्वकप जित्ने अस्ट्रेलियाली टोलीका महत्त्वपूर्ण सदस्य थिए।
‘मैले अस्ट्रेलियाका लागि खेलेको हरेक टी-२० खेलको आनन्द लिएँ, विशेषगरी २०२१ को विश्वकप। त्यो केवल जितका कारण मात्र होइन, त्यो बेलाको उत्कृष्ट टोली र रमाइलो वातावरणका कारण पनि अविस्मरणीय छ’, स्टार्कले भने।
उनको अन्तिम टी-२० खेल सन् २०२४ मा क्यारेबियनमा भएको विश्वकप थियो।
स्टार्कले टेस्ट क्रिकेट सधैं आफ्नो पहिलो प्राथमिकतामा रहेको बताए।
सन् २०२६ को मध्यदेखि अस्ट्रेलियाको टेस्ट तालिका निकै व्यस्त छ, जसमा बंगलादेशविरुद्ध घरेलु शृंखला, दक्षिण अफ्रिका भ्रमण, न्युजिल्यान्डविरुद्ध चार टेस्ट, सन् २०२७ मा भारतमा पाँच टेस्ट र इंग्ल्यान्डविरुद्ध मेलबर्नमा १५०औँ वार्षिकोत्सवको अवसरमा हुने एक विशेष टेस्ट समावेश छ।
यसबाहेक, अस्ट्रेलियाले सन् २०२७ मा दक्षिण अफ्रिका, जिम्बाब्वे र नामिबियामा हुने एकदिवसीय विश्वकपमा आफ्नो उपाधि रक्षा गर्नेछ।
‘भारतमा हुने टेस्ट भ्रमण, एशेज र २०२७ को एकदिवसीय विश्वकपलाई हेर्दा, यो निर्णयले मलाई यी ठूला प्रतियोगिताहरूका लागि ताजा र फिट रहन मद्दत गर्नेछ। साथै, यसले नयाँ बलिङ युनिटलाई अर्को टी-२० विश्वकपको तयारीका लागि समय पनि दिनेछ’, स्टार्कले थपे।
क्रिकेट अस्ट्रेलियाका छनोट समितिका अध्यक्ष जर्ज बेलीले स्टार्कको टी-२० करियरको प्रशंसा गर्दै भने, ‘मिचेललाई आफ्नो टी-२० करियरप्रति गर्व हुनुपर्छ। उनी २०२१ को विश्वकप विजेता टोलीका एक महत्त्वपूर्ण हिस्सा थिए। उनको विकेट लिने क्षमताले धेरै पटक खेलको स्वरूप नै परिवर्तन गरिदिएको थियो। हामी उनको योगदानको सम्मान गर्नेछौँ र खुसीको कुरा यो छ कि उनी टेस्ट र एकदिवसीय क्रिकेटमा लामो समयसम्म खेल्न चाहन्छन्।’
भदौ १७, २०८२ मंगलबार ०८:०९:०९ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
