आइतबारदेखि ठप्प कर्णाली राजमार्ग अझै खुलेन, जुम्लाका स्याउ बोकेका २३ वटा ट्रक बाटोमै अलपत्र
जुम्ला : कालीकोटको गगनेखोलामा पहिरो खस्दा कर्णाली राजमार्ग बन्द भएको छ।
गत आइतबारदेखि राजमार्ग पूर्ण रुपमा बन्द हुँदा जुम्लाबाट करिब १८४ मेट्रिक टन स्याउ बोकेर गएका २३ वटा ट्रक बाटोमै रोकिएका छन्। ती ट्रक पहिरो गएको स्थान नजिकै रोकिएको कृषि विकास कार्यालय जुम्लाका प्रमुख रामभक्त अधिकारीले जानकारी दिए। करिब १३ करोड रुपैयाँ बराबरका स्याउ ती ट्रकमा छन्।
अवरुद्ध सडक सञ्चालनका लागि पहल भइरहेको छ। सडकमाथिबाट ठूला-ठूला ढुङ्गा खसेकाले सडक खोल्न समय लागेको जनाइएको छ।
नेपाली सेना परिचालन गरी ढुङ्गा फुटाउने काम भइरहेको सडक डिभिजन कार्यालय जुम्लाका प्रमुख दीपेन्द्रकुमार चौधरीले जानकारी दिए। दुई दिनदेखि सडक अवरुद्ध हुँदा यात्रुसमेत बिचल्लीमा परेको स्थानीयवासी कल्पना बुढाले बताए।
भदौ १६, २०८२ सोमबार १९:४८:१८ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
