विश्वकप लिग २ : मुन्सी र बेरिङ्टनको अर्धशतकमा क्यानडामाथि स्कटल्याण्डको शानदार जित
काठमाडौं : आईसीसी पुरुष क्रिकेट विश्वकप लिग २ अन्तर्गतको ८१औं खेलमा स्कटल्याण्डले आयोजक क्यानडालाई ७ विकेटले पराजित गरेको छ।
जर्ज मुन्सी र कप्तान रिची बेरिङ्टनको उत्कृष्ट अर्धशतकीय साझेदारीको मद्दतले स्कटल्याण्डले सहज जित हात पारेको हो।
किंग सिटीस्थित मेपल लिफ नर्थ-वेस्ट ग्राउन्डमा टस जितेर पहिले फिल्डिङ रोजेको स्कटल्याण्डले क्यानडालाई ४८.१ ओभरमा १८४ रनमा अलआउट गर्यो।
जवाफमा स्कटल्याण्डले ४१.५ ओभरमा मात्र ३ विकेट गुमाएर १८७ रन बनाउँदै लक्ष्य पूरा गर्यो।
क्यानडाको खराब ब्याटिङ, मोभाले सम्हाले
पहिले ब्याटिङ गरेको क्यानडाको सुरुवात निकै निराशाजनक रह्यो। टोलीले मात्र १८ रन बनाउँदा आफ्ना ५ महत्त्वपूर्ण विकेट गुमाइसकेको थियो। स्कटल्याण्डका बलर ब्राड करीले घातक बलिङ गर्दै क्यानडाको शीर्ष क्रमलाई ध्वस्त पारे।
तर, मध्यक्रमका विकेटकिपर-ब्याट्सम्यान श्रेयस मोभाले एकातर्फबाट इनिङ्स सम्हाले। उनले ११० बलमा ३ चौका र ३ छक्कासहित सर्वाधिक ६० रनको महत्त्वपूर्ण पारी खेले। उनलाई साद बिन जफरले २९ रन र जस्करन सिंहले ३२ रन बनाएर साथ दिएका थिए।
अन्त्यमा कलीम सानाले ७ बलमा अविजित १६ रन बनाउँदै टोलीको स्कोर १८४ सम्म पुर्याए।
स्कटल्याण्डका लागि ब्राड करीले १० ओभरमा मात्र २६ रन खर्चेर ४ विकेट लिए। त्यस्तै, ब्रान्डन म्याकमुलेनले २ तथा जोश डेभी, मार्क वाट र सफयान शरिफले समान १-१ विकेट लिए।
१८५ रनको लक्ष्य पछ्याएको स्कटल्याण्डको सुरुवात पनि राम्रो हुन सकेन। टोलीले २१ रन बनाउँदा आफ्ना दुई विकेट गुमाइसकेको थियो। क्यानडाका बलर कलीम सानाले दुवै ओपनरलाई पेभिलियन फर्काए।
तर, त्यसपछि जर्ज मुन्सी र कप्तान रिची बेरिङ्टनले तेस्रो विकेटका लागि १४६ रनको विशाल साझेदारी गर्दै टोलीलाई जितको बाटोमा डोर्याए। बेरिङ्टन ११८ बलमा ६४ रन बनाएर आउट भए।
अर्कोतर्फ, जर्ज मुन्सीले अविजित रहँदै १०३ बलमा ७ चौका र ४ छक्कासहित ८४ रनको म्याच-विजेता पारी खेले। उनले ब्याटिङका साथै फिल्डिङमा २ महत्त्वपूर्ण क्याच पनि लिए, जसकारण उनी ‘प्लेयर अफ द म्याच’ समेत घोषित भए।
यो जितसँगै स्कटल्याण्डले विश्वकप लिग २ को अंक तालिकामा महत्त्वपूर्ण २ अंक जोड्दै २२ खेलमा २७ अंक बनाएको छ। स्कटल्याण्ड हाल तेस्रो स्थानमा छ भने अमेरिका र नेदरल्यान्ड्स समान २८/२८ अंकसहित क्रमश: पहिलो र दोस्रो स्थानमा छ।
भदौ १६, २०८२ सोमबार ०९:३९:४७ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
