गाजा हमलामा हमासका प्रवक्ता अबु उबैदा मारिएको इजरायलको दाबी

एजेन्सी : इजरायलले हमासको सशस्त्र समूहका प्रवक्ता अबु उबैदाको गाजा सिटीमा भएको एक हवाई हमलामा मारिएको दाबी गरेको छ।

इजरायलका रक्षामन्त्री इजरायल कात्जले सामाजिक सञ्जाल एक्समा एक पोस्टमार्फत इजरायली रक्षा बल र सुरक्षा एजेन्सी शिन बेटलाई यो काम सम्पन्न गरेकोमा बधाई दिएका छन्।

यद्यपि, हमासले हालसम्म उबैदाको मृत्युको पुष्टि गरेको छैन। यसअघि प्यालेस्टिनी सशस्त्र समूहले एक आवासीय भवनमा भएको इजरायली हवाई हमलामा दर्जनौं नागरिक मारिएको र घाइते भएको बताएको थियो।

स्थानीय पत्रकारहरूले गाजा सिटीको घना बस्ती भएको अल-रिमाल क्षेत्रमा भएको हमलामा कम्तीमा सात जनाको मृत्यु भएको र बालबालिकासहित २० जना घाइते भएको बताएका छन्।

रक्षामन्त्री कात्जले आइतबार चेतावनी दिँदै उबैदाका अन्य ‘आपराधिक साझेदारहरू’लाई पनि निशाना बनाइने बताएका छन्।

यसैबीच, आईडीएफ र शिन बेटले एक संयुक्त विज्ञप्तिमा भनेका छन्, ‘यो अभियान र आईडीएफको गुप्तचर निर्देशनालयबाट पहिले नै संकलन गरिएको जानकारीका कारण सम्भव भएको हो, जसमा उनको लुक्ने ठाउँको पहिचान गरिएको थियो।’

उबैदा हमासको सैन्य शाखाका केही वरिष्ठ सदस्यहरूमध्ये एक थिए, जो ७ अक्टोबर २०२३ मा दक्षिणी इजरायलमा भएको घातक हमलाभन्दा पहिलेदेखि नै सक्रिय थिए। उनी सधैँ आफ्नो अनुहार ढाकेर सार्वजनिक हुने गर्दथे।

भदौ १६, २०८२ सोमबार ०८:११:३३ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।