काठमाडौंमा फैलिएको ‘किड्नी तस्करी’को नाइके श्यामकृष्ण, दिल्लीमा शाखा अफिस

काठमाडौं : सिन्धुपाल्चोक सुनकोसी गाउँपालिका–७ का ३८ वर्षीय श्यामकृष्ण भण्डारीले काठमाडौं केन्द्रित भएर किड्नी बेचबिखनको जालो फैलाएको प्रहरीले दाबी गरेको छ। मानव बेचबिखन अनुसन्धान ब्युरोले उनलाई दिल्ली प्रहरीको सहयोगमा नेपाल ल्याएर आइतबार सार्वजनिक गरेको हो।

ब्युरोका एसएसपी कृष्ण पंगेनीका अनुसार भण्डारी अहिलेसम्मका किड्नी तस्करीमा संलग्न सबैभन्दा ठूलो योजनाकार देखिएका छन्। उनको निर्देशनमा नेपाली नागरिकलाई आर्थिक प्रलोभनमा पारेर भारत लगेर किड्नी बेच्ने काम भइरहेको उनले दाबी गरे।

प्रहरीका अनुसार भण्डारी करिब पाँच वर्षदेखि भारतमै बसेर नेपालमा तस्करीको जालो फैलाउन सक्रिय थिए। उनले नेपालका विभिन्न अस्पतालका कर्मचारी, एजेन्ट र दलालसँग मिलेर नेपाली नागरिकको किड्नी भारतीयलाई बिक्री गर्ने गरेका थिए।

प्रहरीका अनुसार प्रारम्भिक अनुसन्धानमा भण्डारीले हालसम्म २५ भन्दा बढी व्यक्तिको किड्नी निकालेको स्वीकार गरेको र एक सयभन्दा बढीको मिर्गौला बेचिएको हुनसक्ने दाबी गरेको छ।

यसै घटनामा जोडिएको आरोपमा प्रहरीले सिन्धुपाल्चोक इन्द्रावती–२ का २९ वर्षीय सुजन भारतीलाई समेत पक्राउ गरिएको छ। प्रहरीका अनुसार भारती दिल्लीमा भण्डारीसँगै बस्दै आएको प्रहरीको दाबी छ।

आधार कार्ड बनाएर तस्करी

प्रहरीका अनुसार भण्डारी भारतमा बसेर नेपालमा आफ्नो सहयोगीहरू परिचालन गर्ने गरेका थिए। उनले आफ्नो नाममै भारतीय आधार कार्ड बनाएर त्यसकै आधारमा दिल्लीका अस्पतालसँग सम्पर्क राखेर आफ्नो जालो फैलाएका थिए। प्रहरीका अनुसार उनले किड्नी चाहिने व्यक्तिसँग प्रतिव्यक्ति १० लाख रुपैयाँसम्म लिएर किड्नी दिनेलाई भने पाँच हजार दिने गरेका थिए।

प्रहरीले यो घटनासँग जोडिएका सात जनालाई पक्राउ गरिसकेको छ। पक्राउ परेकामध्ये केहीले पहिला आफ्नो मिर्गौला बेचेर पछि भण्डारीका लागि काम सुरु गरेका थिए।

पक्राउ परेकाविरुद्ध मानव बेचबिखन तथा ओसारपसार (नियन्त्रण) ऐन २०६४ र सङ्गठित अपराध निवारण ऐन २०७० अन्तर्गत मुद्दा दर्ता गरिएको छ।

भदौ १५, २०८२ आइतबार २०:३८:३९ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।