नारायणकाजी श्रेष्ठ विरुद्ध अदालतको अवहेलनामा मुद्दा दर्ता

काठमाडौं : माओवादी केन्द्रका वरिष्ठ उपाध्यक्ष एवं राष्ट्रिय सभा सदस्य नारायणकाजी श्रेष्ठ विरुद्ध अदालतको अवहेलनामा मुद्दा दर्ता भएको छ।

सर्वोच्च अदालतमा शुक्रवार पेस भएको मुद्दा आज आइतबार दर्ता भएको हो। कानुनका विद्यार्थी आयुष दाहालले श्रेष्ठले भदौ ६ गते सामाजिक सञ्जाल फेसबुकमा गरेको पोस्टबाट अदालतको अवहेलना भएको जिकिर गर्दै रिट दिएका थिए। उक्त मुद्दाको पेसी भदौ १९का लागि  तोकिएको छ।

श्रेष्ठले भनसुन र घुस बिना अदालतबाट न्याय नपाउने भनी सामाजिक सञ्जालमार्फत अदालतप्रति अनास्था फैलाउने खालको सामग्री पोस्ट गरेका थिए।

उनले लेखेका थिए'अहिले न्यायालयको स्थिति यस्तो छ कि न्यायका लागि अदालत पुग्ने कुनै पनि नेपालीले आफ्नो सम्पर्क पहुँचद्वारा न्यायाधीशलाई भन्न, भनाउन वा भनसुन गर्न सक्दैन भने वा घुस खुवाउन सक्दैन भने न्याय पाउला भनेर आशा गर्न सकिने स्थिति छैन।'

उपाध्यक्ष श्रेष्ठको अभिव्यक्तिले अदालतको मर्यादा एवं निष्पक्षता माथि गम्भीर आघात पुग्न गएको, राज्यका तीन अंगमध्ये एक व्यवस्थापिकाको सदस्य भएर अर्को अंग न्यायपालिकामाथि क्षेत्राधिकारबाहिर गएर अमर्यादित टिप्पणी गरेको, कुनै एउटा फैसला वा विषयवस्तुमा नभएर समग्रतामा न्यायालय र न्यायमूर्तिमाथि अविश्वास र अनास्था फैलाउने काम भएको भन्दै अदालतको अवहेलनामा कारबाहीको माग गरिएको छ।

भदौ १५, २०८२ आइतबार १९:५९:५४ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।