रुपन्देहीको उप-निर्वाचनमा डा लेखजंग रास्वपाबाट उम्मेदवार

काठमाडौं : आकाङ्क्षीको निवेदनदेखि सभापतिसँगको भेटघाटसम्मको प्रक्रिया पुरा गरेर राष्ट्रिय स्वतन्त्र पार्टी (रास्वपा)ले रुपन्देही क्षेत्र नम्बर ३ मा हुन लागेको उपनिर्वाचनमा डा. लेखजंग थापालाई उम्मेदवार बनाउने निर्णय गरेको छ। आन्तरिक निर्वाचनको प्रक्रिया सक्काएर उसले आइतबार ९ जना आकाङ्क्षीमध्ये डा थापालाई उम्मेदवार बनाउने निर्णय गरेको हो। 

उपनिर्वाचनका लागि थापासहित ज्ञानु पौडेल, जितबहादुर गुप्ता, सुलभ खरेल, मधुप्रसाद अर्याल, पार्थिवेन्द्र उपाध्याय, कुसुम महर्जन, पुनमकुमारी अग्रवाल र रचना क्षेत्री आकाङ्क्षी थिए। रास्वपाले १२ भदौ बिहान ७ बजेदेखि साँझ ७ बजेसम्म प्राइमरी इलेक्सन गरेर त्यसमा सबैभन्दा धेरै मत ल्याएकोलाई नै उम्मेदवार बनाउने निर्णय गरेको दाबी गरे पनि मत परिणाम भने सार्वजनिक गरेको छैन। नौ जान आकाङ्क्षीलाई पार्टीका नेताहरूले आइतबार नक्खु लगेर पार्टीका सभापति रवि लामिछानेसँग भेटाएका थिए।

उपनिर्वाचनमा उम्मेदवार बनाउने निर्णय गरिएको डा थापा वरिष्ठ न्युरोलोजिस्ट हुन्। हाल उनी नेसनल न्युरो सेन्टर महाराजगन्ज काठमाडौंका न्युरोलोजी विभाग प्रमुख छन्। 

भदौ १५, २०८२ आइतबार १९:५२:५५ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।