माधव-झलनाथको बढ्दो दुरीसँगै धनश्याम खनालसँग नजिकिए
काठमाडौं : एकीकृत समाजवादीमा पार्टी अध्यक्ष माधव नेपाल र सम्मानित नेता झलनाथ खनालबीच बढ्दो असमझदारीसँगै पार्टीभित्र खनाल र महासचिव घनश्याम भुसालपक्ष अलग बैठकमार्फत रणनीति निर्माणमा जुटेका छन्।
दुवै समूहले आफू निकट नेताहरूलाई नयाँ बानेश्वरस्थित बानेश्वर क्याम्पसमा बोलाएर छलफल गरिरहेका छन्। पार्टी अध्यक्ष नेपालमाथि भ्रष्टाचार मुद्दा लागेसँगै एक अन्तर्वार्तामा खनालले एमाले विभाजन गरेर एकीकृत समाजवादी गठनको औचित्य पुष्टि नभएको बताएसँगै माधवसँग सार्वजनिक रूपमै मनमुटाब सुरु भएको थियो।
खनालको भनाइको प्रतिवाद गर्दै नेपालले यस्ता व्यक्ति पार्टीमा बस्न नसुहाउने भन्दै पार्टी छाड्न भनेपछि खनालले बोल्ने क्रममा केही त्रुटि भएको भए आन्तरिक रूपमा छलफल गर्नु पर्नेमा तानाशाही शैलीमा सार्वजनिक रूपमा पार्टी छाड्न भनेको भन्दै असन्तुष्टि जनाएका थिए। योसँगै दुबैबीच बढेको मनमुटाब सकिएको छैन।
यही बेलामा सम्मानित नेता र महासचिव आफ्ना नेताहरूसहित अलग्गै छलफलमा जुट्नुले एकीकृत समाजवादी भित्र थप ध्रुवीकरण बढ्ने देखिन्छ।
भदौ १५, २०८२ आइतबार १६:२८:०४ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
