गेटा अस्पतालको एचडियु कक्षमा सुरू भयो डा. गोविन्द केसीको अनसन

कैलाली : डा. गोविन्द केसीले कैलालीको गेटा अस्पतालबाट अनसन सुरु गरेका छन्। डा केसीले आकस्मिक कक्ष नजिकै रहेको एचडियु कक्षमा बसेर अनसन सुरू गरेको अस्पताल स्रोतले बतायो।

निजी मेडिकल कलेजहरूको सिट वृद्धि, सरकारी मेडिकल कलेजहरूको सञ्चालनमा ढिलाइ, स्वास्थ्य सेवामा गिरावट र सीमा अतिक्रमणलगायत विषयलाई उठान गर्दै उनले आजदेखि तीन दिने अनसन सुरु गरेका हुन्।

‘गुणस्तरीय, निस्शुल्क र सस्तो स्वास्थ्य सेवा तथा शिक्षा सबै नेपालीको अधिकार हो। तर, सरकार र आयोगले निजी मेडिकल कलेजलाई फाइदा पुग्नेगरी गरिएको सिट वृद्धि गैरजिम्मेवार निर्णय हो। यसले शिक्षा मात्र होइन, स्वास्थ्य सेवाको गुणस्तरमै दीर्घकालीन असर पार्छ,’ डा. केसीले जारी गरेको विज्ञप्तीमा भनिएको छ।  

उनले इलाम, उदयपुर र डडेलधुरामा सरकारसँग भएका सम्झौता अनुसार मेडिकल कलेज तथा अस्पताल खोल्नुपर्ने, पाँच वर्षअघि निर्माण सम्पन्न भए पनि कैलालीको गेटामा शैक्षिक कार्यक्रम र अस्पताल सेवा सञ्चालन गर्नुपर्ने माग राखेका छन्। साथै, निजी मेडिकल कलेजलाई मनपरी सिट वितरण रोक्नुपर्ने उनले स्पष्ट पारेका छन्।

डा. केसीले प्रधानमन्त्री केपी शर्मा ओली र शेरबहादुर देउवाको नेतृत्वमा बनेका सरकारहरू निजी मेडिकल कलेजलाई संरक्षण गर्न उद्यत रहेको आरोप लगाएका छन्। त्रिवि शिक्षण अस्पतालले १०० जना एमबीबीएस विद्यार्थी भर्ना गर्न पूर्वाधार नपुग्ने भन्दै हिच्किचाइरहेको अवस्थामा त्यसको एक तिहाइभन्दा कम पूर्वाधार भएका निजी कलेजलाई १३० सिट दिनु दुर्भाग्यपूर्ण भएको उनको भनाइ छ।

उनले आयोगका पदाधिकारीहरूको निकम्मापनका कारण माफिया र निहित स्वार्थी नेताहरू लाभान्वित भएको दाबी गर्दै तत्काल निर्णय फिर्ता गर्न आग्रह गरेका छन्।

भदौ १५, २०८२ आइतबार १४:१२:२९ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।