शहीद गंगालाल हृदय केन्द्र र राप्ती स्वास्थ्य विज्ञान प्रतिष्ठानबीच चिकित्सा शिक्षा सहकार्य सम्झौता
काठमाडौं : शहीद गंगालाल राष्ट्रिय हृदय केन्द्र, बाँसबारी, काठमाडौँ र राप्ती स्वास्थ्य विज्ञान प्रतिष्ठान, दाङबीच चिकित्सा शिक्षा तथा अनुसन्धानमा सहकार्य बढाउने उद्देश्यले सम्झौतापत्रमा हस्ताक्षर भएको छ।
सम्झौताअनुसार राप्ती स्वास्थ्य विज्ञान प्रतिष्ठानका विद्यार्थी तथा प्रशिक्षार्थीहरूले हृदय केन्द्रमा ‘क्लिनिकल पोस्टिङ’ र तालिममा सहभागी हुन पाउनेछन्। यसका साथै हृदय सेवा, शिक्षा र अनुसन्धानको विकासमा प्राविधिक सहयोग र सहकार्य गर्ने दुवै पक्षले प्रतिबद्धता जनाएको छ। शहीद गंगालाल राष्ट्रिय हृदय केन्द्रले राप्ती प्रतिष्ठानको हृदयरोग सम्बन्धी रिफरल सेन्टरको रूपमा काम गर्नेछ।
सम्झौतापत्रअनुसार, विद्यार्थी तथा प्रशिक्षार्थीहरूको समूहगत प्रयोगात्मक अभ्यासलाई राप्ती स्वास्थ्य विज्ञान प्रतिष्ठानले व्यवस्थापन गर्नेछ भने उनीहरूको कार्यतालिका, सहभागी संख्या र नामावली कार्यक्रम सुरु हुन कम्तीमा एक महिना अघि शहीद गंगालाल हृदय केन्द्रलाई बुझाउनुपर्नेछ।
अभ्यासका क्रममा आवश्यक पर्ने सामग्रीहरू प्रयोग गर्न प्रथम पक्षको अनुमति लिनुपर्नेछ भने हराए वा बिग्रिएमा सोधभर्ना दोस्रो पक्षले गर्नेछ।
कार्यक्रम सञ्चालनका लागि द्वितीय पक्षले केन्द्रको निर्देशक कार्यालयसँग समन्वय गर्नु पर्नेछ। शैक्षिक सत्र अनुसार आर्थिक वर्षमा आधारित करारको अवधि अधिकतम ६ महिनासम्मको प्रयोगात्मक अभ्यासका लागि लागू हुनेछ।
साथै, सम्बन्धित विश्वविद्यालय, काउन्सिल वा आधिकारिक संस्थाबाट स्वीकृति पत्र र कर तिरेको प्रमाण पनि केन्द्रमा पेश गर्नुपर्नेछ।
विद्यार्थीहरूले तालिका अनुसार अभ्यासमा सहभागी हुनुपर्नेछ र अभ्यास सकिएपछि तयार पारेको प्रतिवेदन केन्द्रमा बुझाउनुपर्नेछ। सम्झौतामा कुनै पनि शर्तमा संशोधन, थप वा हटाउने काम दुबै पक्षको सहमतिबाट मात्र हुनेछ।
यो सम्झौता भाद्र १५, २०८२ देखि २०८५ आषाढ मसान्तसम्म तीन आर्थिक वर्षका लागि लागू हुने र आपसी सहमतिमा अवधि थप गर्न सकिने व्यवस्था गरिएको छ।
शहीद गंगालाल राष्ट्रिय हृदय केन्द्र र राप्ती स्वास्थ्य विज्ञान प्रतिष्ठानबीचको यस सहकार्यले चिकित्सा शिक्षा र हृदयसम्बन्धी अनुसन्धानको क्षेत्रमा नयाँ सम्भावनाहरू सिर्जना गर्ने विश्वास व्यक्त गरिएको छ।
भदौ १५, २०८२ आइतबार १२:०७:२५ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
