परराष्ट्रमन्त्री राणाले बूढानीलकण्ठस्थित निवासमा भित्र्याइन् गौरा

काठमाडौं : परराष्ट्रमन्त्री डा. आरजु राणा देउवाले बूढानीलकण्ठस्थित निवासमा धार्मिक अनुष्ठानसहित गौरा भित्र्याएकी छन्। विशेष पूजाआजासँगै उनले गौरा पर्वको सुरुवात गरेकी हुन्।

उनले यसअघि प्रत्येक वर्ष गौरा पूजनका लागि धनगढी पुग्ने परम्परा रहेकोमा यसपटक धनगढीस्थित निवास पुनर्निर्माणमा रहेकाले काठमाडौँमै गौरा भित्र्याएको बताइन्। 

भाद्र सप्तमीका दिन बाजागाजासहित विभिन्न वनस्पतिबाट बनेको गौराको मूर्ति देवी पार्वतीको प्रतीकका रूपमा घर र मन्दिरमा भित्र्याउने प्रचलन छ।

गौरा पर्व सुदूरपश्चिमेलीको सांस्कृतिक पहिचान भएको उल्लेख गर्दै मन्त्री राणाले आफू प्रत्येक वर्ष निष्ठापूर्वक व्रत बस्दै पूजा गर्ने बताइन्। यस पर्वले सामाजिक एकता, सहिष्णुता र भाइचारालाई मजबुत बनाउने विश्वास समेत उनले व्यक्त गरिन्।

भाद्र शुक्ल पञ्चमीको बिरुडा पञ्चमीबाट सुरु भई अष्टमीसम्म चल्ने गौरा पूजामा महिलाहरू निराहार व्रत बस्दै शिव–गौरीको आराधना गर्छन्। सौभाग्य, सुख, शान्ति र समृद्धिका लागि गरिने यस धार्मिक अनुष्ठानलाई सुदूरपश्चिम र कर्णाली प्रदेशमा विशेष रुपमा मनाइन्छ।

भदौ १४, २०८२ शनिबार २१:३४:४५ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।