राप्ती प्रतिष्ठानमा प्रभावकारी बन्दै न्यूरो सर्जरी सेवा, पाँच महिनामा २ हजार ५ सय बढीले पाए सेवा
दाङ : राप्ती स्वास्थ्य विज्ञान प्रतिष्ठानमा न्यूरो सर्जरी सेवा प्रभावकारी बन्दै गएको छ। यसअघि न्यूरो सम्बन्धी उपचारका लागि जिल्लाबाहिर जानुपर्ने बाध्यता हट्दै गएको हो।
प्रतिष्ठानमा पाँच महिनाको अवधिमा करिब २ हजार ५ सय बिरामीले न्यूरो सम्बन्धी ओपीडी सेवाबाट उपचार लिएका छन्।
कोहलपुर र नेपालगञ्ज मेडिकल कलेजमा लामो अनुभवसहित न्यूरो सर्जरी सेवामा काम गरिरहेकी न्यूरो सर्जन डा. उपमा शर्माले प्रतिष्ठानमा सेवा सुरु गरेसँगै न्यूरो उपचारमा सहजता भएको हो। डा. उपमाले अहिले प्रतिष्ठानमै स्पाइन र ब्रेन सम्बन्धी शल्यक्रिया सुरु भइसकेको बताउँदै अब न्यूरो उपचारका लागि बाहिर जानुपर्ने अवस्था नरहेको बताइन्।
उनका अनुसार हालसम्म करिब ६ वटा स्पाइन तथा गत असारदेखि ५ वटा ब्रेन सम्बन्धी अपरेशन गरिएका छन्, जसमा सबै बिरामी उपचारपछि घर फर्किसकेका छन्।
प्रतिष्ठानमा न्यूरो सर्जरी सेवामार्फत टाउको, गर्दन, ढाड, हातखुट्टा दुख्ने समस्या, दुर्घटना वा लडाइँका कारण टाउको–ढाडमा लागेको चोट, नसा च्यापिने समस्या, लकवा (पक्षघात/प्यारालाइसिस), रगत जम्ने (ब्रेन हेमोरेज), मिर्गी (इपिलेप्सी), बेहोस हुने, ब्रेन वा ढाडको ट्युमर, कम्मर दुख्ने, हातखुट्टा झम्झमाउने वा पोल्ने, निदाउने लगायतका उपचार उपलब्ध भइरहेको छ।
यसैबीच, प्रतिष्ठानका रजिस्ट्रार प्रा. श्याम लम्सालले ब्रेन ट्युमरको अपरेशन सुरु भएसँगै दाङमै न्यूरो सर्जरी सेवा हुनेमा यसलाई ठूलो उपलब्धि मानिएको बताए। उनका अनुसार यसै वर्ष न्युरोसर्जरीका सबै आवश्यक उपकरण व्यवस्थापनको अन्तिम तयारी भइरहेको छ। सरकारले यसका लागि १४ करोड विनियोजन गरेको र हाल टेण्डर प्रक्रिया अगाडि बढिरहेको लम्सालले जानकारी दिए।
यस्तै, रजिस्ट्रार लम्सालका अनुसार मुटु उपचारका लागि १० करोड लागतको क्याथ ल्याब मेसिन भाद्र महिनाभित्र जडान हुँदैछ भने ४ अर्ब ५१ करोड लागतको ४०० शैयाको अस्पताल यसै आर्थिक वर्षदेखि निर्माण थालिनेछ।
भदौ १४, २०८२ शनिबार २०:३७:०९ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
