‘डिपिआर’मै सीमित भयो चुत्रेनी खेलमैदान

म्याग्दी : म्याग्दीको बेनी नगरपालिका-६ चुत्रेनीमा निर्माण गर्न लागिएको खेलमैदान चार वर्षदेखि विस्तृत परियोजना प्रतिवेदन (डिपिआर)मै सीमित छ।

विसं २०७८ मा करिब चार करोड लागत अनुमानसहित डिपिआर तयार भए पनि आर्थिक अभावले काम सुरु हुन सकेको छैन।

बेनी नगरपालिका-६ का वडाध्यक्ष कृष्णसिंह बानियाँका अनुसार स्थानीय तहसँग पर्याप्त स्रोत नभएकाले योजना अघि बढ्न सकेको छैन। ‘११ ए साइडको फुटबल खेल सञ्चालन गर्न सकिने मैदान बनाउन संघ र प्रदेश सरकारलाई प्रस्ताव गरे पनि प्राथमिकतामा परेन,’ उनले बताए, ‘प्रदेश र संघीय तहबाट साथ नपाउँदा सुविधायुक्त मैदान निर्माण रोकिएको छ।’ 

विसं २०७९ मा गण्डकी प्रदेशमा भएको नवौं राष्ट्रिय खेलकुद प्रतियोगिताका लागि चुत्रेनी मैदानको चर्चा भए पनि त्यो व्यवहारमा आउन सकेन। त्यतिबेला राष्ट्रिय खेलकुद परिषद् र प्राविधिक टोलीले मैदानको अवलोकनसमेत गरेका थिए।

बेनी बजारदेखि करिब चार किलोमिटर पश्चिम, म्याग्दी नदी किनारमा रहेको बालजागृति आधारभूत विद्यालय परिसरको मैदानमा प्यारापिट, घेराबार, स्टेजलगायत पूर्वाधार आवश्यक छ। हालसम्म बेनी नगरपालिकाले करिब ४० लाख खर्च गरी मैदान सम्याउने, भूमिगत पानी व्यवस्थापन गर्ने र केही भागमा तारजाली लगाउने काम गरेको वडाध्यक्ष बानियाँले जानकारी दिए।

फुटबल, क्रिकेट, भलिबल, बास्केटबलदेखि एथलेटिक्ससम्मका खेल सञ्चालन गर्न पर्याप्त क्षेत्र रहे पनि सुविधा अभावले मैदान व्यवस्थित हुन नसकेको मुनसन युवा क्लबका अध्यक्ष दिनेश बानियाँको भनाइ छ। ‘बेनी नगरपालिकामा यत्रो ठूलो मैदान छ तर सरोकारवालाको ध्यान पुगेको छैन, यो दुःखद् हो,’ उनले भने, ‘यदि पूर्वाधार तयार पार्न सकियो भने खेलकुदसँगै आर्थिक र सामाजिक क्षेत्रमा ठूलो योगदान पुग्ने थियो।’ 

भदौ १४, २०८२ शनिबार १७:०६:४७ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।