नगर प्रहरीलाई मेयर बालेनको निर्देशन- बोली नरम गर्नुस्, कानुन कार्यान्वयनमा कठोर बन्नुस्
काठमाडौं : काठमाडौं महानगरपालिकाका प्रमुख बालेन्द्र साह (बालेन)ले नगर प्रहरीलाई आम नागरिकसँग नरम र विनम्र व्यवहार प्रस्तुत गर्न तर कानुन कार्यान्वयनमा भने कठोर बन्न निर्देशन दिएका छन्।
३३औं महानगर प्रहरी दिवसका अवसरमा आयोजित कार्यक्रमलाई सम्बोधन गर्दै उनले नगर प्रहरीले राज्यका अन्य सुरक्षा सङ्गठनहरूसँग समन्वय र सहकार्य गरेर अघि बढ्नुपर्नेमा जोड दिए।
प्रमुख साहले महानगरभित्र अतिक्रमण हटाउने, सार्वजनिक सम्पत्तिको संरक्षण गर्ने तथा सुव्यवस्था कायम गर्न नगर प्रहरीले खेलेको भूमिकाको प्रशंसा गर्दै भने, ‘महानगर प्रहरीले निर्वाह गरेको भूमिकाको म सराहना गर्दछु। अब कानुन, नीतिनियम पालना गराउन थप सक्रिय भएर लाग्नुहोस्।’
कार्यक्रममा उपप्रमुख सुनिता डङ्गोलले कुनै व्यक्ति विशेषको नभई आम जनता र संस्थाको हितमा काम गर्न नगर प्रहरी बललाई निर्देशन दिइन्।
‘नागरिकको सुखदुःख, जात्रा, पर्वमा सधैँ जनतासँगै हुने नगर प्रहरीले संस्थाको असल प्रतिनिधिको रूपमा काम गर्नुपर्छ’, उनले भनिन्।
नेपाल प्रहरीका अतिरिक्त महानिरीक्षक (एआईजी) टेकबहादुर तामाङले नेपाल प्रहरी र महानगर प्रहरीको सहकार्यमा अनधिकृत संरचना हटाउने काम नतिजामुखी ढङ्गले अघि बढेको बताए।
एक वर्षमा साढे ३ करोड राजस्व सङ्कलन
महानगर प्रहरी बलका प्रमुख राजु पाण्डेले बलले अनधिकृत संरचना हटाउनेदेखि विपद् र सवारी व्यवस्थापनसम्मका काम गर्दै आएको जानकारी दिए।
गत आर्थिक वर्षमा मात्रै नियम उल्लङ्घन गर्ने २० हजार ७३४ सवारीसाधन र तोकिएको स्थानबाहेक अन्यत्र फोहर फाल्ने ३९७ जनालाई कारबाही गरिएको थियो। उक्त कारबाहीबाट महानगरको कोषमा ३ करोड ५६ लाख रुपैयाँ राजस्व सङ्कलन भएको छ।
दिवसका अवसरमा प्रहरी बलले स्वयम्भूनाथ र वसन्तपुर दरबार क्षेत्रमा सरसफाइ तथा विभिन्न स्थानमा वृक्षरोपण समेत गरेको थियो।
सो अवसरमा उत्कृष्ट कार्य सम्पादन गर्ने नगर प्रहरीहरूलाई पुरस्कृत गरिएको थियो। यस वर्षको ‘महानगर प्रहरी गौरव’ पुरस्कार वरिष्ठ नगर प्रहरी निरीक्षक लक्ष्मी महर्जनलाई प्रदान गरियो।
त्यसैगरी, ‘उत्कृष्ट महानगर प्रहरी पुरस्कार’ हवल्दार बालकृष्ण कार्कीलाई तथा ‘महानगर प्रहरी पुरस्कार’ हवल्दारद्वय विजय तामाङ, मणिराम खनाल र प्रहरी जवान फिलिपी सारु मगरलाई प्रदान गरिएको थियो।
भदौ १४, २०८२ शनिबार १३:४०:०५ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
