कर्णाली प्रदेश : सहकर्मीबाटै असुरक्षित महिला स्वास्थ्यकर्मी, जातीय विभेददेखि बलात्कार प्रयाससम्म

सुर्खेत : नागरिकको स्वास्थ्य रक्षाका लागि दुर्गममा खटिएका महिला स्वास्थ्यकर्मीहरू आफ्नै कार्यक्षेत्रमा कति असुरक्षित छन् भन्ने तथ्य कर्णाली प्रदेशमा भएका दुई घटनाले पुनः उजागर गरेको छ।

भदौ १० गते राति हुम्लामा भएको सामूहिक बलात्कार प्रयासको घटना र गत पुसमा मुगुमा एक अनमीले भोगेको श्रृंखलाबद्ध यौन दुर्व्यवहार र जातीय विभेदले दुर्गममा कार्यरत महिला स्वास्थ्यकर्मीको भयावह अवस्थालाई सतहमा ल्याइदिएको छ।

हुम्लामा सहकर्मीबाटै सामूहिक बलात्कारको प्रयास
हुम्लाको ताँजाकोट गाउँपालिका-३ स्थित मैला स्वास्थ्य चौकीमा कार्यरत ३० वर्षीया एक महिला स्वास्थ्यकर्मीमाथि उनकै सहकर्मीहरूबाट सामूहिक बलात्कारको प्रयास भयो।

भदौ १० गते राति मदिराले लठ्ठ भएर पीडितको कोठामा पुगेका स्वास्थ्य चौकी इन्चार्ज ३५ वर्षीय लिलाराज शर्मा, कार्यालय सहयोगी ३२ वर्षीय रामबहादुर बोहरा र एम्बुलेन्स चालक ३० वर्षीय मंगल शाहीले बलात्कार प्रयास गरेको आरोपमा पीडितले जिल्ला प्रहरी कार्यालय, हुम्लामा उजुरी दिइन्।

पीडितको उजुरीपछि तत्काल घटनास्थल पुगेको प्रहरी टोलीले भदौ ११ गते तीनै जनालाई नियन्त्रणमा लियो।

‘आफ्नै कार्यालयमा कार्यरत महिला स्वास्थ्यकर्मीको कोठामा गई सामूहिक बलात्कार प्रयास गरेको उजुरीका आधारमा हाकिमसहित तीनै जनालाई पक्राउ गरी अनुसन्धान थालिएको छ,’ जिल्ला प्रहरी कार्यालयका सूचना अधिकारी, प्रहरी निरीक्षक विष्णु श्रेष्ठले भने, ‘घटनाको सत्यतथ्य विस्तृत अनुसन्धानपछि खुल्नेछ।’

पीडित महिलाको स्वास्थ्य परीक्षण भदौ १२ गते जिल्ला अस्पताल हुम्लामा गरिएको छ।

मुगुमा पनि यौन दुर्व्यवहार र जातीय विभेद
गत पुसमा मुगुको सोरु गाउँपालिकामा कार्यरत २३ वर्षीया अनमी तुलसाकुमारी विश्वकर्माले भोगेको हिंसाले यो समस्याको गहिराइलाई झनै स्पष्ट पार्छ।

प्रदेश लोकसेवामार्फत नियुक्त भई २०७९ माघमा खनाया स्वास्थ्य चौकीमा खटिएकी उनलाई स्थानीय युवाहरूले राति अनावश्यक फोन गर्ने, औषधिको बहानामा कोठासम्म पुग्ने र मदिराको नशामा हिंसा गर्ने गरेका थिए।

यति मात्र होइन, तत्कालीन निमित्त प्रमुख प्रशासकीय अधिकृत वीरेन्द्र मल्लले समेत राति फोन गरेर भेट्न बोलाउने गरेको आरोप उनले लगाएकी थिइन्।

लगातारको यौन दुर्व्यवहार, धम्की र जातीय विभेद सहन नसकेपछि उनले पालिका र प्रदेश सरकारसँग सरुवाका लागि पटक-पटक गुहार मागिन्। तर, उनको सरुवा प्रक्रिया अघि नबढेपछि यो विषय सञ्चारमाध्यममा आएको थियो।

घटना सार्वजनिक भएपछि मात्रै उनलाई सदरमुकाम ल्याइयो र उनले आफूमाथि जातीय विभेद र यौन हिंसा गर्नेहरूविरुद्ध प्रहरीमा उजुरी दिइन्। प्रहरीले आरोपितहरूलाई पक्राउ गरे पनि अदालतले उनीहरूलाई धरौटीमा छाड्ने आदेश दियो।

छ दिनमा दुई ठाउँमा स्वास्थ्य चौकी तोडफोड र चोरी
एकातिर महिला स्वास्थ्यकर्मीहरू मानवीय असुरक्षा र हिंसाको पीडामा छन् भने अर्कोतिर स्वास्थ्य चौकीमै ताोडफोड र चोरीका घटना भएका छन्। जुम्लामा पछिल्लो ६ दिनको अन्तरालमा दुईवटा स्वास्थ्य चौकीमा तोडफोड र चोरी भएका हुन्।

जुम्लाको तातोपानी गाउँपालिका-४, हाँकुस्थित स्वास्थ्य चौकीमा भदौ ६ गते राति अज्ञात समूहले तोडफोड गरी चोरी गर्यो। वडाध्यक्ष अमरबहादुर रोकायाका अनुसार स्वास्थ्य चौकीका सामान तोडफोड गर्नुका साथै ल्यापटप, राष्ट्रिय झण्डा, र नुन बिक्रीबाट संकलित ११ हजार ३ सय रुपैयाँसमेत चोरी भयो।

त्यसैगरी, सिंजा गाउँपालिका-१ स्थित धाँपा स्वास्थ्य चौकीमा भदौ ११ गते तोडफोड भयो। स्वास्थ्य चौकी प्रमुख मिनप्रसाद तिवारीका अनुसार अज्ञात समूहले एउटा ल्यापटप, दुईवटा डेस्कटप कम्प्युटर, बल्ब र अन्य स्वास्थ्य उपकरण चोरेर लगेको छ।

जिल्ला प्रहरी कार्यालय जुम्लाका डीएसपी रविनबाबु रेग्मीले सार्वजनिक संरचनामा तोडफोड र चोरीका घटना बढेको स्वीकार्दै अनुसन्धानका लागि नराकोट प्रहरी चौकीलाई निर्देशन दिइएको बताए।

भदौ १४, २०८२ शनिबार १३:०२:५२ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।