मुस्ताङ गोल्ड रक्सीको सिलबन्दी बोतलमा झिँगा भेटियो, इन्द्रचोक र वसन्तपुरबाट ३१ लिटर तेल नष्ट

काठमाडौं : चाडपर्व नजिकिँदै गर्दा बजार अनुगमनलाई तीव्रता दिएको काठमाडौं महानगरपालिकाले एक चर्चित मदिराको सिलबन्दी बोतलभित्र झिँगा फेला पारेपछि उत्पादक कम्पनीलाई दुई लाख रुपैयाँ जरिवाना गरेको छ।

धनुषा डिस्टिलरी प्रालिद्वारा उत्पादित ‘मुस्ताङ गोल्ड’ नामक पेय पदार्थमा अखाद्य वस्तु भेटिएको हो। उपभोक्ताबाट आएको गुनासोका आधारमा महानगरको टोलीले बजारबाट उक्त मदिराको नमूना संकलन गरी जाँच गरेको थियो।

जाँचका क्रममा सिलबन्दी बोतलभित्र झिँगा रहेको पुष्टि भएपछि ‘बजार व्यवस्थापन तथा अनुगमन ऐन, २०७५’ अनुसार कारबाही गरिएको महानगरको कृषि तथा पशुपक्षी विभागका प्रमुख नुरनिधि न्यौपानेले जानकारी दिए।

कम्पनीले जरिवाना रकम महानगरको राजस्व खातामा जम्मा गर्नुपर्नेछ।

३१ लिटर अखाद्य तेल नष्ट
यसैगरी, महानगरको अनुगमन टोलीले इन्द्रचोक र वसन्तपुर क्षेत्रमा पनि अनुगमन गरेको छ। अनुगमनका क्रममा चार रेस्टुराँ र एक मिठाई पसलमा प्रयोग गर्न अयोग्य ३१ लिटर तेल फेला पारेपछि त्यसलाई नष्ट गरिएको महानगरले जनाएको छ।

टोलीले व्यवसायीहरूलाई खाद्य स्वच्छता कायम राख्न, सरसफाइमा ध्यान दिन, तार्ने तेल बारम्बार प्रयोग नगर्न तथा शाकाहारी र मांसाहारी खाद्यवस्तु छुट्टाछुट्टै भण्डारण गर्न निर्देशन दिएको छ।

महानगरले चाडपर्वलाई लक्षित गरी बजार अनुगमनलाई तीव्रता दिएको र उपभोक्ताको स्वास्थ्यमाथि खेलबाड गर्ने أي कसैलाई पनि कानुनबमोजिम कारबाही गरिने प्रतिबद्धता जनाएको छ।

भदौ १४, २०८२ शनिबार ११:३७:२५ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।