अण्डाणु फ्रिज गर्न चाहन्थिन् सोहा, ३५ वर्षमा डाक्टरकोमा जाँदा भने- ‘यसका लागि बुढी भइसक्यौ’

एजेन्सी : बलिउड अभिनेत्री सोहा अली खानले हालै सुरू गरेको आफ्नो पोडकास्टमा एक व्यक्तिगत र रोचक खुलासा गरेकी छिन्।

३५ वर्षको उमेरमा आफ्नो अण्डाणु (एग्स) फ्रिज गराउन डाक्टरकहाँ जाँदा उनलाई ‘धेरै ढिलो भयो’ भन्दै फर्काइएको बताएकी हुन्।

सोहाले ‘अल अबाउट हर’ नामक पोडकास्ट सुरु गरेकी छन्, जसमा उनी सरोगेसी, धर्मपुत्र-पुत्री र बच्चा जन्माउने प्रक्रियासँग जोडिएका चिकित्सकीय, भावनात्मक र सामाजिक पक्षहरूमा चर्चा गर्छिन्।

पोडकास्टको हालैको एपिसोडमा अभिनेत्री सनी लियोनी र प्रजनन विशेषज्ञ डा. किरण कोएल्हो अतिथिको रूपमा सहभागी थिए।

सोही क्रममा सोहाले आफ्नो अनुभव सुनाउँदै भनिन्, ‘मलाई याद छ, म ३५ वर्षकी थिएँ जब म स्त्रीरोग विशेषज्ञकहाँ गएर आफ्नो अण्डाणु फ्रिज गर्न चाहेको बताएँ। डाक्टरले भन्नुभयो- यसका लागि तिमी धेरै बुढी भइसक्यौ। मैले भनेँ- सबैले मलाई जवान देखिन्छ भन्छन्। उहाँले जवाफ दिनुभयो- तिम्रो ओभरी (अण्डाशय) ले तिम्रो अनुहार हेर्न सक्दैन। यो कुरा मेरो दिमागमा लामो समयसम्म रह्यो।’

अहिले प्रजनन क्षमता जाँच्नका लागि धेरै विश्वसनीय परीक्षणहरू उपलब्ध भएको भन्दै उनले अण्डाणु फ्रिज गर्ने खास उमेर २८ देखि ३४ वर्षको बीचमा भएको बताइन्।

गर्भवती हुन नचाहेकाले सरोगेसी रोजेँ: सनी लियोनी
पोडकास्टमा सहभागी अभिनेत्री सनी लियोनीले पनि आफ्नो अनुभव सुनाइन्। उनले आफू व्यक्तिगत रूपमा गर्भवती हुन नचाहेको र यही कारणले सरोगेसीको बाटो रोजेको बताइन्।

सोहाले अभिनेता कुणाल खेमुसँग विवाह गरेकी हुन् र उनीहरुकी एक छोरी इनाया छिन्। यस्तै, सनी र उनका पति डेनियल वेबरका तीन सन्तान छन्। उनीहरूले छोरी निशालाई धर्मपुत्रीको रूपमा अपनाएका हुन् भने छोराहरू अशर र नोआ सरोगेसीमार्फत जन्मिएका हुन्।

सोहा दिग्गज अभिनेत्री शर्मिला टैगोर र पूर्व भारतीय क्रिकेट कप्तान मंसूर अली खान पटौदीकी छोरी तथा अभिनेता सैफ अली खानकी बहिनी हुन्। उनले ‘रंग दे बसंती’ जस्ता सफल फिल्मबाट आफ्नो पहिचान बनाएकी हुन्।

भदौ १४, २०८२ शनिबार १०:३०:३२ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।