बाँकेका छ स्थानीय तहमा ‘लम्पी स्किन’ सङ्क्रमण
नेपालगञ्ज : बाँके जिल्लाका छ स्थानीय तहका पशु चौपायामा ‘लम्पी स्किन’ रोगको सङ्क्रमण फैलिएको छ।
भेटेरिनरी अस्पताल तथा पशु सेवा विज्ञ केन्द्रका योजना अधिकृत तथा सूचना अधिकारी भोजबहादुर रावलका अनुसार जिल्लाका सात स्थानीय तहमध्ये छ वटामा सङ्क्रमण देखिएको हो र संक्रमित पशुको उपचार सुरु भइसकेको छ।
सङ्क्रमण बढ्दो अवस्थामा भए पनि स्थानीय तहले तदारुकताका साथ उपचार गरिरहेको रावलले जानकारी दिए। अहिलेसम्म राप्तीसोनारी, जानकी गाउँपालिका, कोहलपुर नगरपालिका, नरैनापुर गाउँपालिका, खजुरा, बैजनाथ र डुडुवाका विभिन्न क्षेत्रमा रोग देखिएको हो। तर नेपालगञ्ज उपमहानगरपालिकामा भने हालसम्म सङ्क्रमण पुष्टि भएको छैन।
रावलका अनुसार एक महिनादेखि गाई र गोरुमा बढी समस्या देखिएको हो। संक्रमित पशुको विवरण संकलन भइरहेको छ, जसका कारण सङ्ख्या अझै बढ्ने अनुमान गरिएको छ।
जानकी गाउँपालिकाका पशु सेवा शाखा प्रमुख दिलबहादुर खड्काले किसानलाई अनुदानमा औषधि वितरण भइरहेको बताए। उनका अनुसार नेपालमै उपलब्ध नभएका केही औषधि भारतको रुपैडिहाबाट ल्याएर उपचारमा प्रयोग भइरहेको छ।
त्यस्तै, राप्तीसोनारी गाउँपालिकाका पशु सेवा विभाग प्रमुख जयबहादुर कार्कीले वडा नं. १, २ र ६ मा सङ्क्रमण देखिएको जनाउँदै भ्याक्सिन उपलब्धताका लागि विज्ञ केन्द्रलाई पत्राचार गरिएको जानकारी दिए।
भदौ १३, २०८२ शुक्रबार २१:४७:२८ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
