दीपक-दीपा र जितुको पानी बाराबार सकियो, सँगै अमेरिका टूर गर्ने

काठमाडौं : दीपकराज गिरी र दीपाश्री निरौलाको टिमबाट जितु नेपाल बाहिरिएको लामै समय भयो। दीपालाई मुन्द्रेको कमेडीबाट निकालिएपछि जितु र दीपाको पानी बाराबार जस्तै भयो। दीपा मात्र होइन, दीपक पनि जितुसँग बोलेनन्।

त्यति भइसकेपछि दीपक-दीपाको फिल्ममा जितु अटेनन् कुरै भएन। बाहिर बाहिर सहकार्य गर्छौँ भने पनि जितुलाई ‘छक्का पञ्जा’ टिमबाट निकालियो। यो टिमबाट बाहिरिएपछि जितुले ‘म पनि हिरो बन्न सक्छु’ भन्दै फिल्म ‘ह्यारी कि प्यारी’मा अभिनय गरे। त्यो पनि चल्तीकी हिरोइन साम्राज्ञी राज्यलक्ष्मी शाहसँग जोडी बाँधिएर।

‘छक्का पञ्जा’मा हुँदा कहिल्यै हिरोइनसँग रोमान्स दृश्यमा अभिनय गर्न नपाएका जितुले यसमा साम्राज्ञीको जोडी बने। तर यो फिल्म सुपरफ्लप भयो। डा. भोला रिजालको परिवारले निर्माण गरेको यो फिल्मले जितुलाई माथि उठाउन सकेन। त्यसपछि केही समय उनले फिल्ममा काम गरेनन्।

गत वर्ष उनले अर्को फिल्म ‘ज्वाइँ साब’मा अभिनय गरे, जसले उनलाई गज्जबले उचाल्यो। त्यसपछि उनले अर्को फिल्म ‘कार्साङ’मा अभिनय गर्ने मौका पाए, त्यो पनि पछिल्लो पुस्ताका अभिनेता दयाहाङ राईको टिमसँग। यस फिल्ममा पनि उनले आफू मात्र कमेडियन कलाकार होइन भन्ने देखाएका थिए। तर यो फिल्म पनि फ्लप भयो।

दीपक-दीपा र जितुबीचको पानी बाराबारको अवस्था यथावत रह्यो। दर्शकका अगाडि बोलचाल भएझैँ देखिए पनि भित्रभित्र मनमुटाव थियो।

जब जितुले फिल्म ‘परालको आगो’ र ‘कार्की साइला’बाट हात झिकेको समाचार बाहिरियो, त्यसपछि बजारमा नकारात्मक खबर आउन थाले। यसको प्रभावले दीपक-दीपाले निर्माण गरेको पछिल्लो फिल्म ‘छक्का पञ्जा ४-५’मा पनि जितुको अभावबारे चर्चा चल्यो।

तर पछिल्लो समय उनीहरूको मनमुटाब सकिए जस्तै देखिन्छ। दसैं परेको र घर-परिवारलाई समय दिनुपर्ने भन्दै फिल्म ‘परालको आगो’ छाडेका जितु अन्ततः दसैंकै छेकोमा अमेरिकामा आयोजना हुने ‘छक्का पञ्जा कमेडी टूर’मा सहभागी हुने भएका छन्।

दीपकले शुक्रबार सामाजिक सञ्जालमार्फत जितुसहितको एउटा पोस्टर सार्वजनिक गर्दै टूरको औपचारिक घोषणा गरेका छन्। दीपकले आफू १५ वर्षपछि अमेरिका जान लागेको समेत बताए। 

सेप्टेम्बरदेखि अक्टोबरसम्म हुने टूरमा दीपक-दीपाका साथै मुन्द्रे, आसिफ शाह, धर्मेन्द्र सेवान र गायिका मीना पोखरेलको टिम रहनेछ। न्यूयोर्क, बाल्टिमोर र टेक्साससहितका १५ अमेरिकी सहरमा ‘छक्का पञ्जा कमेडी टूर’मार्फत यो टिमले दर्शकलाई हँसाउने छ।

आफूले अभिनय गरेको फिल्ममा किचलो हुनु र स्टेज कार्यक्रमको मार्केट युवापुस्तामा सर्दै जानुले त होइन, जितु र दीपक-दीपा मिल्न बाध्य भएको ? जे भए पनि दर्शक र कलाकार दुबैलाई मिलेरै काम गर्दा राम्रो हुन्छ नी होइन र ? 
 

भदौ १३, २०८२ शुक्रबार २१:०४:१८ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।