राजमार्गमा हुने पटके कर असुलीमाथि रोक लगाइने

सङ्खुवासभा : जिल्ला प्रशासन कार्यालय सङ्खुवासभाले उत्तर-दक्षिण कोशी राजमार्गमा स्थानीय तहहरूले उठाउँदै आएका पटके कर असुलीमाथि रोक लगाउने भएको छ। गृह मन्त्रालयले गत कात्तिक १२ गते नै जिल्ला प्रशासन कार्यालयमार्फत यस्तो असुली तत्काल बन्द गर्न निर्देशन दिएको थियो।

स्थानीय तहहरूले राष्ट्रिय राजमार्गमा आफूखुसी पटके असुली गरिरहेको गुनासो बढेपछि प्रशासनले रोक लगाउने निर्णय गरेको हो। कोशी राजमार्गअन्तर्गत खाँदबारी नगरपालिका, मकालु गाउँपालिका र चिचिला गाउँपालिकाले विभिन्न नाममा कर उठाउँदै आएका थिए।

सङ्खुवासभाकी प्रमुख जिल्ला अधिकारी सृजना थपलियाले राष्ट्रिय राजमार्गमा पटके असुली गैरसंवैधानिक भएकाले तत्काल रोक लगाइने बताइन्। यसबारे स्थानीय तहलाई आधिकारिक पत्राचार समेत गरिने उनको भनाइ छ।

आज प्रशासन कार्यालयमा भएको पत्रकार भेटघाटमा प्रजिअ थपलियाले जनगुनासोका आधारमा गैरकानुनी रूपमा उठाइँदै आएको कर बन्द गरिने स्पष्ट पारिन्। उनले जिल्लाका तीनवटै स्थानीय तहलाई जानकारी दिइसकेको र यस्ता गतिविधि तत्कालै रोक्न निर्देशन गरिएको बताइन्।

जिल्लाका केही स्थानीय तहले राजमार्गका विभिन्न स्थानमा ढाँट (नाका) राखी ३० रुपैयाँदेखि ६ हजार रुपैयाँसम्म पटके असुली गर्दै आएको पाइएको छ।

भदौ १३, २०८२ शुक्रबार २०:१८:३३ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।