फ्लप फिल्म ‘यो मन त मेरो नेपाली हो’ले ५१औं दिनको केक काट्यो, ‘स्वाहा’ निर्माणको घोषणा

काठमाडौं : गत असार २७ गतेबाट प्रदर्शनमा आएको फिल्म ‘यो मन त मेरो नेपाली हो’ हलमा चलेको न कसैले चाल पायो, न त दर्शकले ‘यो मन त मेरो नेपाली हो’ भन्दै हलमा पुगे। नेपाली कथा र माटो सुहाउँदो फिल्म बनेको भन्दै दुई दिनजति पूर्वका हलमा निर्माता र कलाकार डुले। डुलेको लगानी समेत फिल्मले उठाउन सकेन।

तर अचम्म लाग्दो त के छ भने पनि यो फिल्मले बिहिबार काठमाडौंको अष्टनारायण हलमा गौरवमय ५१औं दिन मनायो। बिहीबार निर्माण पक्षले फिल्मले ५१ दिन हलमा प्रदर्शन गरेको भन्दै अष्टनारायण हलमै खुसियाली मनायो। 

त्यति मात्र होइन, निर्माण पक्षले फिल्मका टिमलाई हलमै सम्मान पनि गर्यो। तर फिल्मले ५१ दिन मनाए पनि हलबाट यो फिल्मको एउटा कलाकारको पारिश्रमिक समेत उठेन। 

५१ दिन मनाएको यो फिल्मले कति कमायो होला त ? यसको कमाइ सुन्दा पनि अचम्म लाग्दो छ। यो फिल्मको केही दिनअघिको बक्स अफिस व्यापार हेर्ने हो भने जम्मा २ हजार ९ सय ६ वटा टिकट बिक्री भएका छन्। त्यसबाट ८ लाख १३ हजार ७ सय ग्रस कलेक्सन भएको छ।

तर निर्माण पक्षले आफ्नो फिल्मले ५१ दिन हलमा मनाएको भन्दै दोस्रो फिल्मको घोषणा समेत गरेको छ। यही टिमले ‘स्वाहा’ फिल्म निर्माण गर्ने घोषणा गरेको छ। यो संयोग हो वा फिल्म डुबेपछि निर्माण पक्षले यस्तो नाम राखेका हुन्, त्यो त उनीहरू नै जानुन। तर फिल्मले एउटा कलाकारको रकम समेत उठाउन सकेन। यो फिल्ममा विजय बराल, विल्सन विक्रम राई (तक्मेबुढा) देखि बुद्धि तामाङ लगायतका कलाकार छन्।

हिरोइनलाई खर्च गरेनन् भने पनि अरु कलाकारले राम्रै दाम कुम्ल्याए। अहिलेका राम्रा पारिश्रमिक लिने कलाकार हुन् विजय बराल। त्यसैले पनि एउटै कलाकारको पारिश्रमिक समेत उठाउन नसकेको फिल्मले ५१ दिन मनायो भन्दै खुसियाली मनाउनुको अर्थ चाहिँ के रहेछ कुन्नि!  

भदौ १३, २०८२ शुक्रबार १९:४४:४० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।