महिलालाई अश्लील मेसेज पठाएको आरोपमा पक्राउ परेका रास्वपाका नेता २० हजार धरौटीमा छुटे

काठमाडौं : राष्ट्रिय स्वतन्त्र पार्टी (रास्वपा) का नेता अरनिको पाँडेलालाई काठमाडौं जिल्ला अदालतले २० हजार रुपैयाँ धरौटीमा रिहा गर्ने आदेश दिएको छ।

शुक्रबार न्यायाधीश ध्रुवराज कार्कीको इजलासले पाँडेलालाई धरौटीमा छाड्ने आदेश दिएको हो। पाँडेलाविरुद्ध विद्युतीय कारोबार ऐन, २०६३ को दफा ४७ अनुसार आरोप लागेको थियो। बुधबार पाँडेलाई बयानका लागि साइबर ब्यूरो बोलाइएको थियो र बिहीबार सरकारी वकिलको कार्यालय काठमाडौंमा प्रतिवेदन पेश गरिएको थियो।

उनविरुद्ध एक महिलाले साउन १२ गते साइबर ब्यूरोमा जाहेरी दिएकी थिइन्। पाँडेले एक महिलालाई अश्लील मेसेज पठाएको खुलेको थियो।

उनले ह्वाट्सएपमा मेसेज पठाएपछि महिलाले ब्लक गरेको र पछि आफ्नो इमेलमार्फत महिलाको इमेलमा अश्लील सन्देश पठाएको शुक्रवार दर्ता भएको अभियोग पत्रमा उल्लेख छ।

जुन इमेलबाट महिलाको इमेलमा अश्लील मेसेज गएको छ त्यो आफ्नै भएको र आफूले नै पठाएको हुनसक्ने भन्दै पाँडेले समेत अभियोग स्वीकार गरेका थिए।

उनी रास्वपाको केन्द्रीय सदस्य हुन्। तर रास्वपा उनीबारे मौन छ। यस अगाडि गण्डकीका नेता पक्राउ परे लगत्तै निलम्बन गरेको थियो। 

भदौ १३, २०८२ शुक्रबार १९:००:४३ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।