शवको हड्डी निकालेर बिक्री गरेको आरोपमा पक्राउ परेका चार जनालाई धरौटीमा छोड्ने आदेश
काठमाडौं : पशुपति आर्यघाटमा दाहसंस्कार भइरहेको शवको हड्डी निकालेर बिक्री गरेको आरोपमा पक्राउ परेका चार जना १०-१० हजार धरौटीमा रिहा भएका छन्।
धरौटीमा रिहा हुनेहरूमा सर्लाहीको लालबन्दी नगरपालिका-२ का ४२ वर्षीय रामनन्दन ठाकुर, काभ्रेको मण्डनदेउपुरका ६१ वर्षीय जीवनाथ ढकाल, उदयपुरको कटारी नगरपालिका-८ का २४ वर्षीय विनायक मैनाली र सप्तरीको बलानबिहुल गाउँपालिका-६ का ४१ वर्षीय मिश्रीलाल यादव रहेका छन्।
काठमाडौं जिल्ला अदालतका न्यायाधीश ईश्वरीप्रसाद भण्डारीको इजलासले उनीहरूलाई धरौटीमा रिहा गर्ने आदेश दिएको हो।
यो प्रकरण २३ साउनमा राम शाहीको मृत्युपछि पशुपति आर्यघाटमा गरिएको अन्त्येष्टि दौरान सार्वजनिक भएको हो। आर्यघाट सेवा केन्द्रबाट खटिएका जीवनाथ ढकाल र उनका सहयोगी विनायक मैनालीले आधा जलिरहेको शवबाट टाउकाको हड्डी निकालेको बताइएको छ।
उक्त हड्डी ढकालले विनायकलाई दिएपछि उनले कपुरको बट्टामा राखेर रामनन्दन ठाकुर र उनका सहयोगी मिश्रीलाल यादवलाई बुझाएको अनुसन्धानमा देखिएको थियो।
भदौ १३, २०८२ शुक्रबार १७:५७:४५ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
